Azərbaycan Tibb Universitetinin (ATU) əməkdaşlarının həmmüəllifi olduğu elmi tədqiqat beynəlxalq nüfuzlu “Mikrobiyoloji Bülteni” jurnalında dərc edilib.

Universitetdən Aztibb.az-a verilən xəbərə görə, ATU-nun Tibbi mikrobiologiya və immunologiya kafedrasının əməkdaşlarının apardığı araşdırma Azərbaycanda insan papilloma virusunun (HPV) yüksək riskli genotiplərinin yayılmasını müxtəlif yaş qrupları və regionlar üzrə öyrənən ilk genişmiqyaslı beynəlxalq elmi hesabatlardan biri kimi xüsusi əhəmiyyət daşıyır.

Tədqiqat ölkəmizdə HPV infeksiyasının molekulyar epidemiologiyasının öyrənilməsi və epidemioloji nəzarət sisteminin inkişafı baxımından mühüm elmi töhfə hesab olunur.

835 qadının laborator nəticələrinin təhlili əsasında aparılan araşdırmada iştirakçıların 37,7 faizində HPV, 31,3 faizində isə yüksək riskli HPV genotipləri aşkarlanıb. Ən geniş yayılan genotiplər HPV-16, HPV-52 və HPV-66 olub.

Müəllifləri Lalə Kazımova, Ruqiyyə Səmədzadə, Müslüm Xanalıbəyli, Yavər Hacısoy və Ramin Bayramlı olan tədqiqatın nəticələri Azərbaycanda HPV infeksiyasının yayılma xüsusiyyətlərinin daha dərindən öyrənilməsi, risk qruplarının müəyyənləşdirilməsi və gələcək profilaktik strategiyaların hazırlanması üçün elmi əsas yaradır.

Qeyd edək ki, “Mikrobiyoloji Bülteni” “Web of Science” (SCIE), “Scopus,” “PubMed/MEDLINE” və EMBASE beynəlxalq elmi bazalarında indekslənir. Jurnalın Impact Factor göstəricisi 0,8, CiteScore göstəricisi 1,5, SJR kvartili Q3, JCR kvartili isə Q4-dür.