Azərbaycan Tibb Universitetinin (ATU) Tədris Terapevtik Klinikasında II Daxili xəstəliklər kafedrasının Daxili xəstəliklər ixtisası üzrə II kurs rezidenti Mark Simanduyev tələbə və rezidentlər üçün “Birincili hiperaldosteronizm” mövzusunda maarifləndirici mühazirə ilə çıxış edib.  

Bu barədə Aztibb.az-a ATU-dan məlumat verilib.

Bildirilib ki, mühazirədə arterial hipertenziyanın mühüm, lakin çox zaman vaxtında aşkarlanmayan səbəblərindən biri olan birincili hiperaldosteronizmə diqqət çəkilib. Çıxış zamanı aldosteron hormonunun həddindən artıq sintezinin ürək-damar sisteminə və böyrəklərə mənfi təsirləri, xəstəliyin əsas alt tipləri və genetik mexanizmləri ətraflı izah edilib. Eyni zamanda, diaqnostik yanaşmalar Endokrin Cəmiyyətinin 2025-ci il tövsiyələri əsasında təqdim olunub.

Bildirilib ki, vaxtında və dəqiq diaqnostika xəstəliyin effektiv müalicəsinə, ağırlaşma riskinin azaldılmasına və pasiyentlərin həyat keyfiyyətinin yaxşılaşdırılmasına imkan yaradır. Belə ki, birincili hiperaldosteronizm arterial hipertenziyanın yalnız bir səbəbi deyil, erkən aşkarlanması və düzgün müalicəsi mümkün olan mühüm klinik vəziyyətdir. Bu baxımdan, arterial hipertenziyası olan pasiyentlərdə xəstəliyin ehtimalının nəzərə alınması, müvafiq müayinələrin aparılması və düzgün müalicə taktikasının seçilməsi xüsusi əhəmiyyət daşıyır.

Qeyd edək ki, tədbir Birləşmiş Millətlər Təşkilatının Dayanıqlı İnkişaf Məqsədlərindən (DİM) xüsusilə DİM 3 – Sağlamlıq və rifah məqsədi ilə uzlaşır. Birincili hiperaldosteronizmin erkən aşkarlanması, arterial hipertenziyanın düzgün diaqnostikası və ağırlaşmaların qarşısının alınması əhalinin sağlamlığının qorunmasına və həyat keyfiyyətinin yüksəldilməsinə xidmət edir.

Bununla yanaşı, mühazirə gələcək həkimlərin elmi biliklərinin və klinik bacarıqlarının inkişafına töhfə verməklə DİM 4 – Keyfiyyətli təhsil məqsədinə, müasir elmi tövsiyələrin klinik praktikaya inteqrasiyasını təşviq etməklə isə DİM 9 – Sənaye, innovasiya və infrastruktur məqsədinin innovasiya və elmi biliklərin tətbiqi istiqamətinə uyğunluq nümayiş etdirir.

Belə maarifləndirici və elmi tədbirlər ATU-da tibbi təhsilin keyfiyyətinin artırılması, müasir diaqnostik yanaşmaların təşviqi və səhiyyədə profilaktik təfəkkürün gücləndirilməsi baxımından mühüm əhəmiyyət daşıyır.