Azərbaycan Tibb Universitetinin (ATU) tələbəsinin elmi tədqiqat işi Çinin Ninbo şəhərində keçirilən VII Dünya Raket İdmanları Elmi Konqresində təqdim olunub. 

Bu barədə Aztibb.az-a ATU-dan məlumat verilib.

Bildirilib ki, ATU-nun II Müalicə-profilaktika fakültəsinin tələbəsi, eyni zamanda Azərbaycan Tennis və Padel Federasiyasının milli səviyyəli akkreditə olunmuş məşqçisi Lamiya Hüseynin araşdırması Azərbaycanın isti iqlim şəraitində məşq edən həvəskar tennisçilərinin hidratasiya vəziyyətinin, tərləmə nəticəsində itirdikləri mayenin miqdarının və maye qəbul etmə vərdişlərinin öyrənilməsinə həsr olunub.

Azərbaycan Tennis və Padel Federasiyasının dəstəyi ilə həyata keçirilən tədqiqat ATU-nun I Daxili xəstəliklər kafedrasının professoru Aytən Məmmədzadənin elmi rəhbərliyi ilə aparılıb. Araşdırmanın nəticələri beynəlxalq konqresdə poster məruzə şəklində təqdim edilib. Bununla yanaşı, “Hydration Status, Sweat Loss, and Fluid Replacement Practices Among Amateur Tennis Players Training in a Hot Climate: A Cross-Sectional Study from Azerbaijan” adlı elmi məqalə konqresin elektron platformasında dərc olunub.

Tədqiqat tennisçilərin sağlamlığının qorunması, fiziki yüklənmə zamanı maye balansının düzgün təmin edilməsi, dehidrasiya riskinin azaldılması və məşq prosesinin elmi əsaslarla təşkili baxımından mühüm əhəmiyyət daşıyır.

Qeyd edək ki, elmi təşəbbüs BMT-nin Dayanıqlı İnkişaf Məqsədləri ilə də uzlaşır. Xüsusilə, 3-cü məqsəd – Sağlamlıq və rifah çərçivəsində idmançıların sağlamlığının qorunmasına və sağlam həyat tərzinin təşviqinə, 4-cü məqsəd – Keyfiyyətli təhsil çərçivəsində tələbələrin elmi-tədqiqat fəaliyyətinə cəlb edilməsinə, 17-ci məqsəd – Dayanıqlı inkişaf naminə tərəfdaşlıq çərçivəsində isə ali təhsil müəssisəsi, idman federasiyası və beynəlxalq elmi platforma arasında əməkdaşlığın gücləndirilməsinə xidmət edir.

L.Hüseynin araşdırmasının beynəlxalq elmi platformada təqdimatı Azərbaycan gənclərinin elmi potensialının inkişaf etdirilməsinin, eləcə də ATU-da formalaşan güclü tədqiqat mühitinin bariz nümunəsidir.