Pnevmoniya (ağciyər iltihabı) xüsusilə körpələr və azyaşlı uşaqlar arasında ciddi sağlamlıq riski yaradan kəskin tənəffüs yolu infeksiyasıdır. Müxtəlif növ viruslar, bakteriyalar və göbələklər sətəlcəmin törədicisi ola bilər. Ağciyər pnevmoniyası qripəbənzər əlamətlərlə kəskin respirator xəstəlikləri və kəskin respirator virus infeksiyaları fonunda inkişaf edir. Lakin vaxtında görülən qabaqlayıcı tədbirlər və düzgün müalicə ilə bu xəstəliyin qarşısını almaq mümkündür.

 

Bu barədə Aztibb.az-a Salyan Rayon Mərkəzi Xəstəxanasının Ailə Sağlamlıq Mərkəzinin həkim-pediatrı Sevinc Dadaşova məlumat verib.

 

Pediatr bildirib ki, pnevmoniyadan, ilk növbədə, uşaqlar əziyyət çəkirlər. Ona görə də valideynlərin başlıca diqqəti peyvəndləməyə yönəlməlidir. Pnevmokok və digər planlı peyvəndlərin vaxtında vurulması uşağı ağır infeksiyalardan qoruyur. Körpələrin ilk 6 ayda yalnız ana südü ilə qidalanması immun sistemini gücləndirir. Otaqların mütəmadi havalandırılması, uşaqların siqaret tüstüsündən uzaq tutulması və əl gigiyenasına riayət edilməsi vacibdir.

 

Onun sözlərinə görə, yüksək hərarət, tez-tez və ya çətinləşmiş tənəffüs, davamlı öskürək, halsızlıq və iştahasızlıq müşahidə etdikdə özbaşına müalicə üsullarına əl atmamaq tövsiyə olunur. Bu zaman vaxt itirmədən pediatra müraciət etmək lazımdır. Pnevmoniyanın profilaktikası düzgün diaqnozun vaxtında qoyulmasıdır.