Psixiatr: Faydasız görünən məlumatları belə yadda saxlamaq beyin üçün xeyirlidir

Məlumatları yadda saxlamaq, hətta həmin bilgilər gündəlik həyatda heç bir işə yaramasa belə, beyin fəaliyyətinə müsbət təsir göstərir. Bu barədə psixiatr Nadejda Solovyova məlumat verib.

Aztibb.az "Life" portalına istinadən yazır ki, ekspertin sözlərinə görə, yeni məlumatların yaddaşda saxlanılması beyində neyron əlaqələrinin yaranmasına kömək edir.

“Yadda saxladığımız məlumatların miqdarı nə qədər çox olarsa, neyron əlaqələrinin formalaşması və beynimizin fəaliyyəti üçün bir o qədər faydalı olar”, – deyə həkim 360.ru-ya müsahibəsində bildirib.

Mütəxəssis bu fikirləri sosial şəbəkələrdə yayılan “İngebоrqa Dapkunayte effekti” adlı fləşmobu şərh edərkən səsləndirib. Fləşmobun iştirakçıları həyatları ilə heç bir əlaqəsi olmadığı halda, tez-tez düşüncələrində canlanan söz və ifadələri paylaşırlar. Ən çox rast gəlinən nümunələrdən biri isə aktrisa İngebоrqa Dapkunaytenin adıdır.

Yaddaşın məşq etdirilməsi üçün ekspert şeirlər öyrənməyi, müxtəlif mətnləri əzbərləməyi və fərqli mövzularda ünsiyyət qurmağı tövsiyə edib. Onun sözlərinə görə, faydasız görünən məlumatları belə yadda saxlamaq beyin üçün faydalıdır.

Qeyd edək ki, beyin xatirələri bəzən əslində baş verməmiş təfərrüatlarla da tamamlaya bilir. Yaddaş keçmişi hazır videoqeyd kimi olduğu şəkildə canlandırmır. İnsan nəyisə xatırlayarkən hadisənin mənzərəsi beyində yenidən formalaşır. Yaddaşdakı boşluqlar isə inandırıcı görünən, lakin həqiqətdə mövcud olmayan təfərrüatlarla doldurula bilər. “Mandela effekti” də məhz bu mexanizmlə əlaqələndirilir.