Qoxu hissinin azalması və ya tam itməsi bəzən sadə bir soyuqdəymə ilə bağlı olsa da, diqqətdən kənarda qalmamalıdır.

Aztibb.az xəbər verir ki, bu problem burun tıxanıqlığı, sinusit, allergiya, burun polipləri, virus infeksiyaları və hətta bəzi nevroloji səbəblərlə əlaqəli ola bilər.

Qoxu itkisi yalnız qidaların dadını azaltmır, həm də həyat keyfiyyətinə və təhlükəsizliyə təsir edir. Məsələn, tüstünü, qaz sızmasını və ya xarab qidanı hiss etməmək risk yarada bilər.

Əgər qoxu itkisi uzun müddət davam edirsə və ya təkrarlanırsa, bu halda LOR müayinəsi vacibdir. Vaxtında diaqnoz problemin səbəbini müəyyən etməyə və düzgün müalicəyə imkan verir.