Azərbaycan Tibb Universitetində (ATU) “AI in Medicine Innovation Programı” çərçivəsində formalaşdırılmış innovativ layihələrin müzakirəsinə həsr olunmuş növbəti görüş keçirilib.
Universitetdən Aztibb.az-a verilən xəbərə görə, tədbirin əsas məqsədi proqram iştirakçıları tərəfindən irəli sürülmüş tibbi problemlər əsasında formalaşdırılan layihə ideyalarını ekspertlərlə birgə qiymətləndirmək, onların inkişaf istiqamətlərini müəyyənləşdirmək və perspektivli təşəbbüslərin növbəti mərhələyə hazırlanmasına dəstək göstərmək olub.
ATU-nun Data-analitika və süni intellekt laboratoriyası, Elmi tədqiqatların idarə olunması departamentinin Startap və kommersiyalaşdırma şöbəsinin birgə təşkilatçılığı ilə baş tutan görüşdə Azərbaycan Dövlət Neft və Sənaye Universitetinin İnnovasiya Mərkəzinin ekspertləri Aysel Sadıqova və Qədim Qədimov da iştirak ediblər.
Görüşdə təqdimatlar dinlənilib, onların innovativ potensialı, elmi və praktik əhəmiyyəti, səhiyyə sahəsində tətbiq imkanları və gələcək inkişaf perspektivləri ətrafında fikir mübadiləsi aparılıb.
Təqdim olunan layihələrin ekspert rəyləri və tövsiyələr nəzərə alınmaqla təkmilləşdirilməsi, növbəti mərhələyə hazırlanması və müvafiq müsabiqədə iştirak üçün hazırlıq işlərinin davam etdirilməsi nəzərdə tutulub.
