Hospitaldan Aztibb.az-a verilən məlumata görə, pasiyentin vəziyyəti təcili tibbi müdaxilə tələb etdiyindən hospitala daxil olduğu andan etibarən zəruri müayinələrə başlanılıb. İnvaziv Kardiologiya şöbəsinin rəisi, invaziv kardioloq İlqar Tahiroğlunun rəhbərliyi ilə həkim briqadası tərəfindən təcili koronar angioqrafiya müayinəsi aparılıb. Müayinənin nəticələrinə əsasən, pasiyentin vəziyyəti nəzərə alınaraq təcili cərrahi müdaxilə qərarı verilib. Ürək-damar Cərrahiyyəsi şöbəsinin rəisi, ürək-damar cərrahı Elməddin Əliyev və onun komandası tərəfindən əməliyyat uğurla icra olunub.

 

Süni qan dövranı aparatının dəstəyi ilə həyata keçirilən mürəkkəb əməliyyat zamanı üç damar üzərində şuntlama əməliyyatı aparılıb. Əməliyyatdan sonra pasiyent yeddi gün Əməliyyatxana, Reanimasiya və Anesteziologiya şöbəsində anestezioloq-reanimatoloqların ciddi nəzarəti altında müalicə alıb. Vəziyyəti stabilləşdikdən sonra palataya köçürülərək dərman müalicəsi davam etdirilib.

Müalicə prosesində əldə olunan müsbət nəticələr xüsusilə diqqətəlayiqdir. Belə ki, əməliyyat zamanı pasiyentin ürəyinin atım fraksiyası təxminən 20 faiz təşkil etdiyi halda, müalicənin 10-cu günündə bu göstərici 50 faizə yüksəlib. Aparılan son exokardioqrafik müayinə də ürəyin funksional vəziyyətində əhəmiyyətli yaxşılaşmanı təsdiqləyib.

 

Təyin olunmuş dərman müalicəsi və həkim nəzarəti ilə müalicə kursunu başa vuran Nazim Quliyev 10 gün sonra sağalaraq evə buraxılıb. Bu klinik nəticə kəskin miokard infarktı zamanı vaxtında göstərilən tibbi yardımın, düzgün seçilmiş müalicə taktikasının, yüksək peşəkarlığın və multidissiplinar həkim komandasının əlaqələndirilmiş fəaliyyətinin əhəmiyyətini bir daha nümayiş etdirir.