Azərbaycan Tibb Universitetinin (ATU) revmatologiya ixtisası üzrə IV kurs rezidenti Rəşad Abızadə ABŞ-nin Orlando şəhərində keçirilən Amerika Revmatologiya Kollecinin illik konqresində (ACR Convergence 2026) iki elmi işlə iştirak edib.
ATU rezidentinin D vitamini ilə bağlı tədqiqatı Avropa Revmatologiya Assosiasiyaları Alyansının (EULAR) gənc revmatoloqlar şəbəkəsi EMEUNET tərəfindən "EMEUNET Top 10 Abstracts – ACR 2026" siyahısına daxil edilib. Bundan əlavə, elmi iş konqresin poster turuna seçilib.
Bu fəaliyyət Birləşmiş Millətlər Təşkilatının Dayanıqlı İnkişaf Məqsədlərindən (DİM) 3-cü məqsəd – Sağlamlıq və rifah ilə də uzlaşır. Belə ki, sistem qırmızı qurdeşənəkli xəstələrdə tromboemboliya riskinin öyrənilməsi xəstəliyin ağırlaşmalarının daha yaxşı qiymətləndirilməsinə və pasiyentlərin sağlamlığının qorunmasına yönəlmiş elmi yanaşmaların inkişafına töhfə verir. Eyni zamanda, beynəlxalq elmi əməkdaşlıq və tədqiqat təcrübəsinin paylaşılması DİM 4 – Keyfiyyətli təhsil və DİM 17 – Dayanıqlı inkişaf naminə tərəfdaşlıq məqsədlərinin mahiyyətinə uyğun olaraq rezidentlərin elmi bilik və peşəkar bacarıqlarının inkişafını dəstəkləyir.
