Həkim 65 yaşdan yuxarı şəxslərdə gizli pnevmoniya riski barədə xəbərdarlıq edib

Pnevmoniya 65 yaşdan yuxarı insanlarda və immun sistemi zəifləmiş şəxslərdə nəzərəçarpan simptomlar olmadan inkişaf edə bilər. Orqanizmin immun reaksiyasının zəif olması səbəbindən xəstəlik bəzən yalnız hərarətin cüzi yüksəlməsi və ümumi yorğunluqla özünü göstərir.

Aztibb.az "RİA Novosti"yə istinadən yazır ki, bu barədə pulmonoloq Alina Abdullina məlumat verib.

“Pnevmoniya 65 yaşdan yuxarı insanlarda və immun sistemi zəifləmiş şəxslərdə simptomsuz keçə bilər. Çünki bu insanlarda immun sisteminin reaksiyası, demək olar ki, müşahidə olunmur”, – deyə mütəxəssis bildirib.

Həkimin sözlərinə görə, yüksək hərarət, üşütmə və digər iltihab əlamətləri orqanizmin infeksiyaya qarşı müdafiə reaksiyası ilə əlaqədardır. Yaşlı və ağır xəstələrdə bu reaksiya xeyli zəifləyə bilər. Nəticədə ağciyərlərin iltihabı, yəni pnevmoniya adi klinik əlamətlər olmadan inkişaf edə bilər.

Bununla belə, xəstəliyin bəzi əlamətləri müşahidə oluna bilər. Abdullina hərarətin 37–37,2 dərəcəyə qədər yüksəlməsini, halsızlığı, ümumi narahatlığı və yuxululuğu belə əlamətlər sırasında qeyd edib. Bu simptomları adi yorğunluq və ya digər xəstəliklərin təzahürü kimi qəbul etmək mümkündür.

Həkim vurğulayıb ki, pnevmoniyanın tamamilə simptomsuz keçməsi olduqca nadir haldır. Daha çox xəstəliyin klinik əlamətlərin zəif ifadə olunduğu, silinmiş formada gedişinə rast gəlinir.