Vərəm və diabet uzunmüddətli soyuqdəymə ilə səhv salına bilər

Aztibb.az "Life" portalına istinadən yazır ki, insanın aylarla müalicəsi tamamlanmamış soyuqdəymə hesab etdiyi halsızlığın arxasında vərəm, xroniki hepatit, şəkərli diabet və digər xəstəliklər dayana bilər. Bu barədə infeksionist həkim Mariyat Muxina açıqlamasında bildirib. Onun sözlərinə görə, ilk növbədə simptomların uzun müddət davam etməsi, gecə tərləməsi, səbəbsiz çəki itkisi və limfa düyünlərinin böyüməsi diqqətə alınmalıdır.

Sadalanan xəstəliklərin heç də hamısı öskürək və hərarətlə müşayiət olunmur. Bəzi hallarda soyuqdəymə ilə qarışdırılan əsas əlamətlər məhz halsızlıq, yuxululuq və əmək qabiliyyətinin azalması olur.

Məsələn, qalxanabənzər vəzinin hormonlarının çatışmazlığı ilə xarakterizə olunan hipotireoz zamanı insanda üşümə və süstlük müşahidə edilə bilər. Dəmir çatışmazlığı anemiyası zamanı isə yorğunluqla yanaşı dərinin solğunlaşması və adi fiziki yüklənmə zamanı ürəkdöyünmə yarana bilər. II tip şəkərli diabet də xüsusilə güclü susuzluq hissi ilə müşayiət olunduqda halsızlıqla özünü göstərə bilər.

Həkimin qeyd etdiyi uzunmüddətli narahatlığın digər mümkün səbəbləri arasında xroniki hepatit, autoimmun xəstəliklər, infeksion endokardit (ürəyin daxili qişasının iltihabı), həmçinin limfomalar və xroniki limfositar leykoz da var.

Muxina ayrıca ağciyər vərəminə diqqət çəkib. Onun sözlərinə görə, öskürək, hərarətin yüksəlməsi, yorğunluq və tərləmə uzun müddət zəif ifadə olunmuş şəkildə davam edə bilər. Ümumdünya Səhiyyə Təşkilatı (ÜST) da xəbərdarlıq edir ki, vərəmin simptomları bəzən insan tibbi yardıma müraciət edənədək aylarla davam edə bilər.

Həkim narahatlıq doğuran əlamətləri üç əsas qrupa bölüb:

• Uzun müddət davam edən yüksək hərarət. Səbəbi bilinməyən hərarət iki-üç həftədən artıq davam edərsə, həkimə müraciət etmək tövsiyə olunur.

• Gecə güclü tərləmə və səbəbsiz çəki itkisi. Xüsusilə tərləmə səbəbindən islanmış paltarları və ya yataq dəstini dəyişmək zərurəti yaranırsa, bu əlamətlərə diqqət yetirilməlidir.

• Limfa düyünlərinin böyüməsi və uzunmüddətli öskürək. Bərkimiş, böyüməkdə davam edən və ya uzun müddət kiçilməyən limfa düyünləri, eləcə də üç həftədən artıq davam edən öskürək müayinə tələb edir.
  
  

Davamlı simptomlar müşahidə olunduqda terapevtə müraciət etmək lazımdır. Həkim müayinədən sonra zəruri analiz və müayinələri müəyyən edə bilər. Eyni zamanda, tibbi yardıma müraciət etmək üçün sadalanan narahatedici əlamətlərin hamısının eyni vaxtda meydana çıxmasını gözləmək düzgün deyil.