Fermentasiya qidaların bakteriya, maya və digər mikroorqanizmlərin iştirakı ilə təbii biokimyəvi proseslər nəticəsində hazırlanması üsuludur. Əslində bu proses minilliklərdir tanınan mayalanmadır. Fermentasiya qidaların dadını və teksturasını dəyişməklə yanaşı, bəzi hallarda onların həzmini asanlaşdıra və qida dəyərini artıra bilər.

Aztibb.az xəbər verir ki, fermentasiya zamanı mikroorqanizmlər oksigenin az olduğu şəraitdə qidanın tərkibindəki karbohidrat, zülal və yağlarla qarşılıqlı təsirə girir. Nəticədə mürəkkəb üzvi birləşmələr daha sadə maddələrə çevrilir.

Fermentasiya demək olar ki, müxtəlif qida və içkilərə tətbiq edilə bilər. Ən çox fermentləşdirilən məhsullar arasında süd məhsulları, tərəvəzlər, meyvələr, ət, taxıllar və çay yer alır. Turşu kələm, mayalanmış xiyar və pomidor, kefir, ayran, qatıq, pendir, kvas və kombuça buna nümunədir.

Fermentləşdirilmiş qidalar vitamin, mineral və digər qida maddələrinin mənbəyi ola bilər. Süd məhsullarında fermentasiya nəticəsində faydalı bakteriyalar yaranır və bu məhsullar həzm sisteminin fəaliyyətini dəstəkləyə bilər. Fermentləşdirilmiş qidaların bağırsaq mikroflorasının və immun sisteminin normal fəaliyyətinə töhfə verə biləcəyi də qeyd olunur.

Lakin bu qidaların hazırlanması və saxlanması zamanı gigiyena qaydalarına riayət etmək vacibdir. Xüsusilə ev şəraitində fermentasiya prosesinin düzgün aparılmaması zərərli mikroorqanizmlərin çoxalmasına və qida zəhərlənmələrinə səbəb ola bilər.

Fermentləşdirilmiş tərəvəzlərin həddindən artıq qəbulu da köp, qaz və bağırsaq narahatlığı yarada bilər. Bu məhsulları rasiona tədricən daxil etmək məsləhətdir. Qastrit, kolit və digər mədə-bağırsaq xəstəliklərinin kəskinləşməsi zamanı isə turşu və fermentləşdirilmiş qidaların qəbulu məhdudlaşdırıla bilər.

Düzgün hazırlanmış və təhlükəsiz saxlanılan fermentləşdirilmiş qidalar balanslı qidalanmanın bir hissəsi ola bilər. Əsas prinsip isə miqdara və məhsulun hazırlanma keyfiyyətinə diqqət yetirməkdir.