Ümumdünya Səhiyyə Təşkilatı uşaqlıq dövründə piylənməni müasir dövrün ciddi ictimai səhiyyə problemlərindən biri hesab edir. Artıq çəki yalnız uşağın görünüşünə deyil, onun fiziki və psixoloji sağlamlığına da təsir göstərə bilər.

Aztibb.az xəbər verir ki, uşaqlıq dövründə piylənmə gələcəkdə 2-ci tip diabet, ürək-damar və əzələ-skelet sistemi xəstəlikləri də daxil olmaqla bir sıra sağlamlıq problemlərinin yaranma riskini artıra bilər.

Artıq çəkili uşaqlarda özünəinamın azalması, sosial uyğunlaşmada çətinliklər və digər psixoloji problemlər də müşahidə oluna bilər. Bu səbəbdən uşağın çəkisində və qidalanma vərdişlərində yaranan dəyişikliklərə vaxtında diqqət yetirmək vacibdir.

Piylənmənin qarşısının alınmasında balanslı qidalanma və yaşa uyğun fiziki aktivlik mühüm rol oynayır. Uşaqların gündəlik rasionunda tərəvəz, meyvə və digər faydalı qidalara üstünlük verilməsi, yüksək kalorili və şəkərli məhsulların isə məhdudlaşdırılması tövsiyə olunur.

Valideynlər uşağın çəkisi ilə bağlı narahatlıq yarandıqda mütəxəssisə müraciət etməlidirlər. Uşaqlarda çəkinin qiymətləndirilməsi yaş, boy və inkişaf xüsusiyyətləri nəzərə alınmaqla aparılmalıdır.