Yayda havanın temperaturu yüksək olduqda buz kimi suya girmək, çox soyuq içkilər qəbul etmək və kondisioneri həddindən artıq aşağı temperaturda işlətmək orqanizm üçün əlavə stress yarada bilər. Temperaturun kəskin dəyişməsi xüsusilə ürək-damar xəstəlikləri olan insanlar üçün risklidir.

Aztibb.az xəbər verir ki, həddindən artıq isinmiş bədənin qəfil soyuq suya salınması sinir reseptorlarını aktivləşdirərək stress hormonlarının ifrazına, damarların kəskin daralmasına və tənəffüsün çətinləşməsinə səbəb ola bilər. Soyuq şok xüsusilə suya girdikdən sonrakı ilk dəqiqələrdə baş verə bilər.

Hipertoniya, ateroskleroz və digər ürək-damar xəstəliklərindən əziyyət çəkən şəxslər temperatur fərqinə daha diqqətli yanaşmalıdırlar.

Kondisionerin temperaturunu çöldəki havadan çox aşağı müəyyənləşdirmək də tövsiyə edilmir. Məsələn, çöldə temperatur 30°C olduğu halda kondisionerin 16-18°C-yə qurulması orqanizm üçün kəskin temperatur fərqi yaradır. Soyuq hava boyun və baş nahiyəsində damar spazmına, baş ağrısına və miqren tutmasına səbəb ola bilər. Kondisioner havanı quruduğundan burun-udlaq və tənəffüs yollarının selikli qişalarında quruluq da yarana bilər.

Çox soyuq içkilər də isti havada ehtiyatla qəbul edilməlidir. Ağız-udlaq və qida borusunun kəskin soyuması reflektor spazma səbəb ola bilər. Soyuq içkilər bəzi insanlarda boğaz və mədə spazmlarını da artıra bilər.

İsti havada təhlükəsiz sərinləmək üçün otaq temperaturunda və ya azca sərin su içmək, alkoqoldan uzaq durmaq və ilıqdan sərinliyə doğru tədricən duş qəbul etmək məsləhətdir. Kondisionerin temperaturunu çöldəki temperaturdan təxminən 5-7°C aşağı saxlamaq daha məqsədəuyğundur.