Azərbaycanda elektron siqaretlərin dövriyyəsinin tam qadağan olunmasından sonra qanunvericilik bazasının yeni tələblərə uyğunlaşdırılması istiqamətində növbəti addım atılıb. Prezident İlham Əliyev bununla bağlı Vergi Məcəlləsinə, "Mülki dövriyyədə olmasına yol verilməyən (mülki dövriyyədən çıxarılmış) əşyaların siyahısı haqqında" və "Qida təhlükəsizliyi haqqında" qanunlara dəyişiklikləri təsdiqləyib.

Aztibb.az xəbər verir ki, dəyişikliklərə əsasən, Azərbaycanda elektron siqaretlərin və onların komponentlərinin idxalı, ixracı, istehsalı, satışı və istifadəsinin qadağan edilməsi ilə əlaqədar qanunvericilik aktları arasında uyğunluq təmin olunur.

Belə ki, elektron siqaretlərin dövriyyəsi tam dayandırıldığı üçün Vergi Məcəlləsindən bu məhsulların aksizli mallar siyahısına daxil edilməsini və onlara aksiz dərəcələrinin tətbiqini nəzərdə tutan müddəalar çıxarılıb.

Bundan başqa, layihə Vergi Məcəlləsində ləğv edilmiş maddələrə edilən istinadların aradan qaldırılmasını, həmçinin "Mülki dövriyyədə olmasına yol verilməyən (mülki dövriyyədən çıxarılmış) əşyaların siyahısı haqqında" və "Qida təhlükəsizliyi haqqında" qanunlarda müvafiq uyğunlaşdırıcı dəyişikliklərin edilməsini nəzərdə tutur.