İnfarktın yalnız yaşlı insanlarda baş verdiyi düşüncəsi artıq öz aktuallığını itirir. Mütəxəssislər gənc yaşlarda kəskin koronar sindrom hallarının artmasına diqqət çəkirlər. Oturaq həyat tərzi, düzgün olmayan qidalanma, siqaret və elektron siqaretlər, xroniki stress, yuxusuzluq, enerji içkiləri və alkoqoldan sui-istifadə ürək-damar sağlamlığı üçün ciddi risk yarada bilər.
Aztibb.az xəbər verir ki, mütəxəssislərin fikrincə, ürək-damar xəstəliklərinin təməli çox vaxt 20-30 yaşlarında qoyulur. Gənclik orqanizmin bərpa qabiliyyətini artırsa da, ürəyi risk faktorlarından qoruyan qalxan deyil. Yüksək təzyiq, xolesterinin artması, siqaret və uzunmüddətli stress illər ərzində damarların zədələnməsinə səbəb ola bilər.
Gənc yaşlarda infarkt riskini artıran əsas amillər arasında hərəkətsizlik, həddindən artıq şəkər və sürətli karbohidrat qəbulu, siqaret, xroniki stress, enerji içkiləri, narkotik maddələr və alkoqoldan həddindən artıq istifadə yer alır.
Ürək problemləri bəzən özünü açıq ağrı ilə deyil, nəfəs darlığı, səbəbsiz yorğunluq, ürəkdöyünmə və döş qəfəsində narahatlıqla göstərə bilər. Adi fiziki fəaliyyətdə əvvəlkindən daha tez yorulmaq, pilləkən qalxarkən nəfəsin çatmaması, gecələr nəfəs darlığı ilə oyanmaq, ürəyin ritmində təkrarlanan pozulmalar diqqətdən kənarda qalmamalıdır.
Döş qəfəsində sıxılma və ya yanma, xüsusilə fiziki fəaliyyət və ya stress zamanı yaranırsa, ürək-damar problemi ilə əlaqəli ola bilər. Ağrının sol çiyinə, çənəyə, kürəklərarası nahiyəyə və ya qarına yayılması da ürək xəstəliyinin əlaməti ola bilər.
Səbəbsiz huş itirmə və ya fiziki yük zamanı göz qaralması isə xüsusilə ciddi siqnal hesab olunur. Belə hallar ürək ritminin pozulması ilə əlaqəli ola biləcəyindən həkim müayinəsi tələb edir.
Ürək sağlamlığını qorumaq üçün gənc yaşlardan arterial təzyiqi və xolesterin səviyyəsini nəzarətdə saxlamaq, qan şəkərini mütəmadi yoxlatdırmaq, siqaretdən və elektron siqaretlərdən uzaq durmaq, enerji içkilərindən istifadəni məhdudlaşdırmaq və kifayət qədər yatmaq vacibdir.
Həmçinin uzun müddət oturmaqdan çəkinmək, gün ərzində daha çox hərəkət etmək və həftə ərzində müntəzəm aerob fiziki aktivliklə məşğul olmaq tövsiyə olunur. Tərəvəz, göyərti, paxlalılar, qoz-fındıq və balıqla zəngin, duz və əlavə şəkəri az olan qidalanma ürək-damar sağlamlığına müsbət təsir göstərə bilər.
Xüsusilə döş qəfəsində yeni başlayan və izah olunmayan ağrı, güclü nəfəs darlığı, huş itirmə və ya ürək ritmində ciddi pozulmalar müşahidə olunarsa, simptomların yaşla əlaqədar olmadığı düşünülməli və tibbi yardım üçün müraciət edilməlidir.
