2026-cı il iyulun 3-də hamiləliyin 28-ci həftəsində olan qadın Respublika Klinik Xəstəxanasının Təcili və Təxirəsalınmaz Tibbi Yardım şöbəsinə daxil olub. Aparılan instrumental və laborator müayinələrin nəticələrinə əsasən pasiyent təcili əməliyyata alınıb. Əməliyyat Hamiləliyin patologiyası şöbəsinin müdiri, mama-ginekoloq Xatirə Həsənova tərəfindən uğurla icra olunub.
Bu barədə Aztibb.az-a Xəstəxanadan məlumat verilib.
Nəticədə 660 qram çəkidə oğlan uşağı dünyaya gəlib.
Yenidoğulmuş dərhal həkim-neonatoloq Xatirə Məmmədovanın nəzarəti altında Yenidoğulmuşların intensiv terapiya bölməsinə yerləşdirilib. Körpənin vəziyyəti nəzərə alınaraq ona mərhələli şəkildə tənəffüs dəstəyi göstərilib. İlk mərhələdə invaziv mexaniki ventilyasiya (İVL), daha sonra isə CPAP və maska vasitəsilə oksigen terapiyası tətbiq olunub.
Körpə 34 gün ərzində Yenidoğulmuşların intensiv terapiya şöbəsində yüksək ixtisaslı tibbi heyətin nəzarəti altında müalicə alıb. Həkimlərin peşəkar yanaşması və göstərilən intensiv tibbi yardım nəticəsində körpənin sağlamlıq vəziyyəti sabitləşib və 1895 qram çəki ilə 2026-cı il avqustun 5-də evə buraxılıb.
Pasiyent və ailə üzvləri göstərilən yüksək peşəkarlığa və qayğıya görə Hamiləliyin patologiyası şöbəsinin müdiri Xatirə Həsənovaya, həkim-neonatoloq Xatirə Məmmədovaya, Hamiləliyin patologiyası şöbəsinin və Yenidoğulmuşların intensiv terapiya bölməsinin kollektivinə, həmçinin Respublika Klinik Xəstəxanasının direktoru Elviz Qasımova səmimi təşəkkürlərini bildiriblər.
