Xroniki obstruktiv ağciyər xəstəliyi (XOAX) ağciyərlərdə hava axınının məhdudlaşmasına səbəb olan xroniki xəstəliklərdən biridir.

Aztibb.az xəbər verir ki, pulmonoloq, professor Əlizamin Sadıqovun sözlərinə görə, xəstəlik zamanı nəfəs alma çətinləşə, xüsusilə fiziki fəaliyyət zamanı təngnəfəslik, uzunmüddətli öskürək və bəlğəm ifrazı müşahidə oluna bilər.

Bəzi insanlar bu əlamətləri illərlə “siqaret öskürəyi” və ya yaşla əlaqəli hal kimi qəbul edərək həkimə müraciəti gecikdirirlər. Halbuki uzun müddət davam edən öskürək, bəlğəm ifrazı və xüsusilə fiziki fəaliyyət zamanı yaranan nəfəs darlığı diqqətdən kənarda qalmamalıdır.

Professor  bildirib ki, XOAX-ın əsas risk faktorlarından biri siqaret çəkməkdir. Bununla yanaşı, uzun müddət toz, tüstü və müxtəlif zərərli kimyəvi maddələrə məruz qalmaq da xəstəliyin yaranma riskini artıra bilər.

XOAX tam sağalmasa da, xəstəliyin erkən mərhələdə aşkarlanması və düzgün müalicə ilə onun gedişinə nəzarət etmək, simptomları azaltmaq və həyat keyfiyyətini qorumaq mümkündür. Bu baxımdan xəstəliyin ilkin əlamətlərinə laqeyd yanaşmamaq və vaxtında mütəxəssisə müraciət etmək mühüm əhəmiyyət daşıyır.

Əgər uzun müddətdir öskürək, bəlğəm ifrazı və ya xüsusilə hərəkət zamanı nəfəs darlığı müşahidə edirsinizsə, bunu adi hal kimi qəbul etməyin. Pulmonoloq müayinəsi və zərurət yarandıqda ağciyər funksiyasının qiymətləndirilməsi bu əlamətlərin səbəbinin müəyyənləşdirilməsinə və düzgün müalicə yanaşmasının seçilməsinə kömək edə bilər.