Tibbi Ərazi Bölmələrini İdarəetmə Birliyi (TƏBİB), Hemofiliyalı Xəstələrin Respublika Assosiasiyası, Novo Nordisk Hemofiliya Fondunun dəstəyi ilə Zaqatala Rayon Mərkəzi Xəstəxanasında yeni fizioterapevtik və reabilitasiya kabinetlərinin açılışı olub.

Bu barədə Aztibb.az-a TƏBİB-dən xəbər verilib.

Kabinetlərin açılışında TƏBİB-in İcraçı direktorunun müşaviri Pərvin Əkbərov, TƏBİB-in Tibbi xidmətlərin təşkili departamenti, İxtisaslı tibbi xidmətlər şöbəsinin müdiri Vüsal Yusifov, Zaqatala Rayon Mərkəzi Xəstəxanasının direktoru Tamara Nurəliyeva, Hemofiliyalı Xəstələrin Respublika Assosiasiyasının sədri Ayaz Hüseynov, Tibbi Reabilitasiya Mərkəzinin direktoru Rüfət Cabbarlı iştirak ediblər.

Kabinetlər bütün zəruri avadanlıqlarla təmin edilib. Yeni kabinetlərin fəaliyyətə başlaması hemofiliya və digər qanın laxtalanması pozğunluğundan əziyyət çəkən vətəndaşlarda xəstəliyin verdiyi fəsadların qarşısının alınmasına və müalicənin multidisiplinar yanaşmasına xidmət edəcək.

Daha sonra müxtəlif profilli 145 həkimin iştirakı ilə konfrans keçirilib. Konfransın açılışında TƏBİB-in fizioterapiya və reabilitasiya işçi qrupunun üzvü Dr. Nəzir Rzalı fizioterapevtik kabinetdə pasiyentlərin qəbulunu həyata keçirib.

TƏBİB-in İcraçı direktorunun müşaviri Pərvin Əkbərov və TƏBİB-in Tibbi xidmətlərin təşkili departamenti, İxtisaslı tibbi xidmətlər şöbəsinin müdiri Vüsal Yusifov və Zaqatala Rayon Mərkəzi Xəstəxanasının direktoru Dr.Tamara Nurəliyeva vətəndaş məmnunluğunun, tibbi xidmətlərə əlçatanlığın artırılması istiqamətində görüləcək işlərin davam edəcəyini bildiriblər.

Hemofiliyalı Xəstələrin Respublika Assosiasiyasının sədri Ayaz Hüseynov 2023-cü il üzrə Assosiasiyanın dövlət səhiyyə qurumları ilə birgə əməkdaşlıq nəticəsində müalicənin keyfiyyətinin artırılması haqda və gələcək perspektivlər barədə çıxış edib.

Sonda Tibbi Reabilitasiya Mərkəzinin direktoru Rüfət Cabbarlı Mərkəzin imkanları haqda məlumat verib, fizioterapiyanın müxtəlif xəstəliklərin müalicəsində vacib rol oynadığını vurğulayıb.