Azərbaycan Respublikası Səhiyyə Nazirliyi, nazirliyin Elmi-Tədqiqat Ağciyər Xəstəlikləri İnstitutunun təşkilatçılığı və Naxçıvan Muxtar Respublikası Səhiyyə Nazirliyinin dəstəyi ilə Naxçıvan şəhərində “Ağciyər xəstəliklərinin diaqnostikası və müalicəsinə müasir yanaşma” mövzusunda elmi-praktik konfrans keçirilib.

 

Bu barədə Aztibb.az-a Səhiyyə Nazirliyindən məlumat verilib.

 

Bildirilib ki, tədbirdə Səhiyyə Nazirliyinin Vərəmlə Mübarizə üzrə Milli Proqramın rəhbəri, nazirliyin Elmi-Tədqiqat Ağciyər Xəstəlikləri İnstitutunun baş direktoru İradə Axundova, Professor Gindes adına Respublika Uşaq və Yeniyetmələr üçün Vərəm və Tənəffüs Orqanlarının Xəstəlikləri Sanatoriyasının direktoru Rəşid Bədəlov, QİÇS-lə Mübarizə Mərkəzinin direktoru Famil Məmmədov və İnstitutun struktur bölmə rəhbərləri iştirak edib.

 

Konfransın əsas məqsədi tənəffüs sistemi xəstəliklərinin erkən diaqnostikası, müasir müalicə yanaşmaları, profilaktik tədbirlər və bu sahədə tətbiq olunan yeniliklərin tibb ictimaiyyətinin diqqətinə çatdırılması olub.

 

Tədbirin açılış mərasimində Naxçıvan Muxtar Respublikası səhiyyə nazirinin müavini, nazir vəzifələrini müvəqqəti icra edən Rəşadət Nabatov çıxış edərək bildirib ki, Azərbaycan Respublikasının Prezidenti cənab İlham Əliyevin rəhbərliyi ilə ölkəmizdə səhiyyə sahəsinin inkişafı daim diqqət mərkəzində saxlanılır. Dövlət başçısının səhiyyə sahəsinə göstərdiyi xüsusi diqqət və qayğı nəticəsində ölkədə müasir səhiyyə infrastrukturu formalaşdırılır, ən son tibbi avadanlıqlarla təchiz olunur. O qeyd edib ki, son dövrlərdə Azərbaycan Respublikası Səhiyyə Nazirliyinin tabeliyində fəaliyyət göstərən elmi-tədqiqat institutlarının aparıcı mütəxəssislərinin Naxçıvana səfərləri artıq ənənə halını alıb.

 

Konfrans çərçivəsində ağciyər xəstəlikləri mövzularında məruzələr təqdim olunub.