Qaraciyərin bədxassəli şişi adətən qaraciyərin sirroz xəstəliyi və hepatit B-nin ağırlaşmasıdır. Bu xəstəlik birincili və ikincili olur. Birincili bədxassəli şiş toxuması qaraciyərin tamamilə özünün xəstəliyi kimi qiymətləndirilir. İkincili olduqda isə bədxassəli şiş toxuması mədə, yoğun bağırsaq, ağciyərlər və digər orqanların metastazı kimi meydana çıxır.

Aztibb.az tibbi mənbələrə istinadən xəbər verir ki, qaraciyərin bədxassəli şişinə ən çox metastaz formada rast gəlinir. 

Xəstəlik aşağıdakı əlamətlərlə özünü biruzə verir:

Arıqlama - Xəstə hər gün yediyi yeməyi qəbul edir, amma sürətlə arıqlayır.

Qarında şişkinlik - Şişkinlik qaraciyərin böyüməsi və həzmin getməməsi səbəbindən olur.

Sarılıq - Sarılığın əmələ gəlməsinə ödün bağırsağa deyil, qan vasitəsilə toxumalara yayılmasıdır.

Dəridə qaşıntı - Öd duzlarının qan vasitəsilə toxumalara yayılması səbəbindən baş verir.

Qaraciyərin iltihablaşması - Öd axarlarının tutulması və hemolitik anemiya səbəbindən əmələ gəlir.

Bunlardan başqa qaraciyər xərçəngi xəstədə bəzi başqa əlamətlərlə özünü göstərə bilir:

- sağ qabırğa altında ağrı;
- ürəkbulanma;
- qarında xoşagəlməz hissiyat;
- qarında köpmə hissi;
- halsızlıq;
- zəiflik;
- qusma;
- temperatur.

Xəstəliyin əmələgəlmə səbəbi tibb elminə hələ də məlum deyil. Amma qaraciyər sirrozu, həddindən artıq spirtli içki qəbulu və bəzi hepatit növlərinin xəstəliyin əmələ gəlməsində risk faktoru olduğu danılmır. Hər 3 qaraciyər xərçəngi xəstəsindən 1-nin xroniki spirtli içki qəbul etdiyi öz təsdiqini tapmışdır.