Laktoza dözümsüzlüyü süd və süd məhsullarının tərkibində olan laktozanın orqanizmdə kifayət qədər həzm olunmaması nəticəsində yaranan geniş yayılmış həzm pozğunluqlarından biridir.

Aztibb.az xəbər verir ki, ümumi cərrah, proktoloq və endoskopist Anar Əliyevin sözlərinə görə, bu vəziyyət orqanizmdə laktozanı parçalayan laktaza fermentinin çatışmazlığı ilə əlaqədardır və nəticədə laktoza bağırsaqlarda tam həzm olunmur: "Bu zaman qarında köp və şişkinlik, qarın ağrısı, qaz yaranması, ishal və xüsusilə süd və süd məhsullarının qəbulundan sonra narahatlıq hissi meydana çıxa bilər".

Həkim bildirir ki, bu əlamətlər digər həzm sistemi xəstəlikləri ilə oxşarlıq təşkil etdiyindən düzgün diaqnozun qoyulması üçün müayinə və zərurət yarandıqda əlavə testlərin aparılması vacibdir.

"Müalicənin əsasını qidalanmanın fərdiləşdirilməsi, laktoza tərkibli məhsulların qəbuluna nəzarət edilməsi və ehtiyac olduqda laktozasız alternativlərdən istifadə təşkil edir. Mütəmadi olaraq köp, qarın ağrısı və ya ishal kimi şikayətləri olan şəxslər vaxt itirmədən mütəxəssisə müraciət etməli və problemin səbəbi dəqiq müəyyənləşdirilməlidir", - deyə ekspert vurğulayıb.