Rusiya Elmlər Akademiyasının akademiki Leo Bokeriya sağlamlığın qorunması və yüksək iş qabiliyyətinin saxlanılması üçün vacib hesab etdiyi gündəlik vərdişləri açıqlayıb.

Aztibb.az xəbnər verir ki, alim "RIA Novosti" agentliyinə müsahibəsində bildirib ki, sağlam həyatın əsas prinsiplərindən biri hər gün eyni vaxtda yatıb eyni vaxtda oyanmağa çalışmaqdır.

"Qısaca desəm, insan hər gün eyni saatda yatmalı və eyni saatda oyanmalıdır. Heç olmasa buna çalışmalıdır. Məsələn, mən uzun illərdir ki, iş günlərində hər səhər saat 06:22-də oyanıram. Bu artıq vərdişə çevrilib. Amma həftə sonları saat 09:00–09:30 radələrində dururam. İmkan olanda bir qədər çox yatmağı sevirəm", – deyə akademik bildirib.

Onun sözlərinə görə, əksər insanlar üçün optimal yuxu müddəti ən azı səkkiz saatdır. O qeyd edib ki, bəzi nadir hallarda insanlar dörd saat yuxu ilə kifayətlənə bilsələr də, bu, tipik hal hesab olunmur.

Akademik yuxunun orqanizmin bərpasındakı roluna xüsusi diqqət çəkərək onu beynin daxili "təmizlənmə" prosesi ilə müqayisə edib. Onun sözlərinə görə, yuxu çatışmazlığı insanın həm əmək məhsuldarlığını, həm də ümumi sağlamlıq vəziyyətini mənfi təsir altına salır.

Leo Bokeriya sağlam həyat tərzi üçün duz və şəkərin qəbulunun normada saxlanılmasını, gündəlik qidalanmada meyvə və tərəvəzlərin payının artırılmasını, həmçinin spirtli içkilərdən həddindən artıq istifadədən çəkinməyi tövsiyə edib.