Allerqoloq Lüdmila Maxovanın sözlərinə görə, yay aylarında ən çox rast gəlinən allergik problemlər pollinoz (bitki tozcuqlarına allergiya) və fotodermatitdir.

Aztibb.az "Actualnews"a istinadən yazır ki, həkim sözlərinə görə, pollinoz çəmən və alaq otlarının çiçəkləmə dövründə meydana çıxır. Fotodermatit isə ultrabənövşəyi şüaların təsiri nəticəsində yaranaraq dəridə qızartı, qaşınma və səpkilərlə özünü göstərir. Bu səbəbdən günəşin ən güclü olduğu saatlarda açıq havada uzun müddət qalmamaq, qapalı geyimlərdən və yüksək SPF-li günəş qoruyucu vasitələrdən istifadə etmək tövsiyə olunur.

Mütəxəssis vurğulayıb ki, allergiyanın kəskinləşmə riskini azaltmaq üçün həkim tərəfindən əvvəlcədən təyin olunan müalicəyə riayət etmək və səfərləri bitkilərin çiçəkləmə təqviminə uyğun planlaşdırmaq vacibdir. Onun sözlərinə görə, ən effektiv müalicə üsulu allergen-spesifik immunoterapiyadır və bu müalicəyə çiçəkləmə mövsümündən bir neçə ay əvvəl başlamaq lazımdır.

Həkim çarpaz allergiya barədə də xəbərdarlıq edib. Belə ki, alaq otlarının tozcuqlarına allergiyası olan şəxslər qarpız, yemiş, xiyar və pomidoru, ağcaqayın tozcuqlarına allergiyası olanlar isə çiy alma, ərik, albalı və digər çəyirdəkli meyvələri ehtiyatla qəbul etməlidirlər.

Bundan əlavə, çiyələk, meşə çiyələyi, papaya, ananas və sitrus meyvələri kimi histaminlə zəngin qidaların həddindən artıq qəbulu dəri və mədə-bağırsaq reaksiyalarını gücləndirə bilər.