Günəş şüaları orqanizm üçün müəyyən faydalara malik olsa da, uzun müddət və nəzarətsiz şəkildə günəş altında qalmaq dəridə yanıq, ləkələnmə, erkən qocalma əlamətləri və hətta dəri xərçəngi riskinin artmasına səbəb ola bilər.

 

Bu barədə Aztibb.az-a Neftçala RMX-nın həkim-dermatoveneroloq Məmmədəli Əhmədov bildirib.

 

Onun sözlərinə görə,dərinin sağlamlığını qorumaq üçün aşağıdakı məsləhətlərə əməl etməliyik:

Hər gün, hətta buludlu havalarda belə SPF 30 və ya daha yüksək qoruyuculu günəş kremindən istifadə edin.

Günəş kremini çölə çıxmazdan təxminən 20-30 dəqiqə əvvəl çəkin və hər 2 saatdan bir yeniləyin.

Günəş şüalarının daha intensiv olduğu 11:00-16:00 saatları arasında açıq havada uzun müddət qalmaqdan çəkinin.

Geniş kənarlı papaqlardan, çətirdən,gün eynəyi və qoruyucu geyimlərdən istifadə edin.

Kifayət qədər maye qəbul edərək dərinizin susuzlaşmasının qarşısını alın.

Dərinizdə yeni yaranan və ya formasında, rəngində dəyişiklik müşahidə etdiyiniz xal və ləkələr olduqda vaxt itirmədən müayinəyə müraciət edin.

 

Məmmədəli Əhmədov qeyd edib ki, günəşdən qorunmaq təkcə estetik deyil, həm də sağlamlıq baxımından vacibdir. Dərinizə bu gün göstərdiyiniz qayğı gələcəkdə bir çox problemlərin qarşısını ala bilər.