Cəbrayıl Rayon Mərkəzi Xəstəxanasında və tabeliyində fəaliyyət göstərən tibb məntəqələrində yanğın təhlükəsizliyi və təxliyə qaydalarına həsr olunmuş növbəti maarifləndirici təlim təşkil edilib.

 

Xəstəxanadan Aztibb.az-a bildirilib ki, təlim Əməyin mühafizəsi üzrə mütəxəssis tərəfindən keçirilərək əməkdaşlara yanğın təhlükəsizliyi qaydaları, yanğınların başvermə səbəbləri, onların qarşısının alınması üsulları, təxliyə prosedurları və fövqəladə hallar zamanı düzgün davranış prinsipləri barədə ətraflı məlumat verilib.

 

Tədbir çərçivəsində tibb işçilərinə yanğınsöndürmə vasitələrinin növləri, təyinatı və istifadə qaydaları izah olunub, yanğın zamanı operativ və düzgün müdaxilə üsulları nümayiş etdirilib. Eyni zamanda, odsöndürən balonlardan istifadə qaydaları əyani şəkildə göstərilərək praktiki məşğələ keçirilib.

 

Təlimin keçirilməsində əsas məqsəd əməkdaşların yanğın təhlükəsizliyi sahəsində bilik və bacarıqlarının artırılması, fövqəladə hallar zamanı təhlükəsiz təxliyənin təmin edilməsi və çevik qərarvermə vərdişlərinin formalaşdırılması olub.