Azərbaycanda broyler toyuqlarının intensiv yetişdirilməsi prosesində hormonlardan istifadə olunması ilə bağlı yayılan iddialar həqiqəti əks etdirmir.

Aztibb.az xəbər verir ki, bu barədə Azərbaycan Qida Təhlükəsizliyi Agentliyinin (AQTA) sədri Qoşqar Təhməzli məlumat verib.

Qoşqar Təhməzli ölkədə quşçuluq sənayesinin çox böyük əhəmiyyət daşıdığını xüsusi vurğulayıb. Sədr bildirib ki, hazırda Azərbaycan quş qripindən azad ölkə statusuna malikdir və bu status quşçuluq məhsullarının dünyanın bir sıra ölkələrinə ixrac edilməsinə geniş imkanlar yaradır.

Ölkəmizin həmçinin ərzaq yumurtasının da ixracını uğurla həyata keçirdiyini qeyd edən AQTA sədri, hesabat dövrü ərzində bu sahədə 100 milyondan çox ərzaqlıq yumurtanın ixrac edildiyini diqqətə çatdırıb.

O, eyni zamanda quşçuluq sənayesindəki son yeniliyi də bölüşüb: “Bu günlərdə Çin Xalq Respublikasının müvafiq qurumları ilə razılıq əldə olunub və Azərbaycanın quşçuluq məhsullarının Çin Xalq Respublikasına da ixracı həyata keçiriləcək”.