Yeni araşdırma göstərib ki, qısamüddətli psixoloji stress belə orqanizmdə sürətli bioloji dəyişikliklərə səbəb ola bilər. Alimlərin fikrincə, stress zamanı sərbəst radikalların istehsalı artır və bu, qan laxtalarının strukturunu daha sıx və möhkəm hala gətirir.

Aztibb.az "Medical news today"ə istinadən yazır ki, Cənubi Uels Universitetinin tədqiqatçıları tərəfindən aparılan araşdırmada 18-30 yaş arasında olan səkkiz sağlam kişi iştirak edib. İştirakçılar əvvəlcə istirahət şəraitində, daha sonra isə xüsusi stress testi zamanı müşahidə olunublar. Test zamanı onlardan münsiflər heyəti və kamera qarşısında çıxış etmək, daha sonra isə mürəkkəb hesablamalar aparmaq tələb olunub.

Qan analizləri göstərib ki, stressdən sonra oksidativ stressin göstəricilərindən biri olan sərbəst radikalların səviyyəsi əhəmiyyətli dərəcədə yüksəlir. Eyni zamanda yaranan qan laxtalarının daha böyük, daha sıx və fibrin lifləri baxımından daha möhkəm olduğu müəyyən edilib. Bu isə qanın laxtalanmaya meylini artıran dəyişikliklərdən xəbər verir.

Tədqiqatçılar vurğulayırlar ki, bu nəticələr qısa müddətli stressin birbaşa infarkt və ya insult yaratdığı anlamına gəlmir. Bununla belə, araşdırma stressin ürək-damar sisteminə təsir mexanizmlərini daha yaxşı anlamağa imkan verir.

Alimlərin fikrincə, gələcəkdə ürək-damar xəstəliklərinin profilaktikasında təkcə stressin psixoloji təsirlərini azaltmaq deyil, həm də stress zamanı aktivləşən biokimyəvi prosesləri hədəfləyən yeni müalicə üsullarının hazırlanması mümkün ola bilər.