“RNC Pharma” Analitik Şirkətinin inkişaf üzrə direktoru Nikolay Bespalov arıqlamaq məqsədilə istifadə olunan preparatların ciddi və hətta ölümcül təhlükələr yarada biləcəyi barədə xəbərdarlıq edib.
Aztibb.az "Medikforum"a istinadən yazır ki, ekspert müsahibəsində bildirib ki, çəki azaltmağa yönəlmiş preparatlar son dövrlər getdikcə daha çox populyarlıq qazanır. Bir çox insanlar onları pəhriz və fiziki aktivlik olmadan arıqlamağın asan yolu kimi qəbul edir. Halbuki bu dərmanlar ilkin olaraq şəkərli diabetin müalicəsi üçün hazırlanıb və onların istifadəsi mütləq tibbi nəzarət altında aparılmalıdır.
Nikolay Bespalovun sözlərinə görə, bu preparatların nəzarətsiz qəbulu ağır nəticələrə səbəb ola bilər. Söhbət yalnız ürəkbulanma, ümumi halsızlıq və ya allergik reaksiyalardan deyil, həm də görmə pozğunluqları kimi daha ciddi fəsadlardan gedir.
Ekspert vurğulayıb ki, özünü artıq çəkili hesab edən hər kəs əslində piylənmədən əziyyət çəkmir. Bəzi hallarda problem psixoloji xarakter daşıyır və mütəxəssis dəstəyi tələb edir. O, özbaşına dərman qəbul etmək əvəzinə balanslaşdırılmış qidalanma, müntəzəm fiziki aktivlik və peşəkar tibbi müşayiəti əhatə edən kompleks yanaşmanı tövsiyə edib.
İyunun 22-də digər ekspert Sergey Şulyak da bəyan edib ki, “Ozempic” və onun analoqlarının istifadəsi fonunda ayrı-ayrı hallarda anoreksiya və qidalanma davranışı pozğunluqları müşahidə olunub. O qeyd edib ki, hətta reseptsiz satılan preparatların qəbulundan əvvəl belə endokrinoloq məsləhəti almaq vacibdir.
Bununla yanaşı, ABŞ alimlərinin son araşdırmaları müasir arıqlama preparatlarının bəzi xərçəng növlərinin inkişaf riskini azalda biləcəyini göstərib. Eyni zamanda mütəxəssislər interval aclıq metodunun da müəyyən risklər daşıdığını bildirirlər. Onların fikrincə, bu yanaşma daha çox gənc insanlar üçün uyğun hesab olunsa da, 50 yaşdan yuxarı şəxslərdə ehtiyatla tətbiq edilməlidir. Belə ki, uzunmüddətli aclıq zamanı orqanizm yağ ehtiyatları ilə yanaşı əzələ kütləsini də itirə bilər.
Diyetoloq-nutritionist Roman Pristanski isə bildirib ki, sərt pəhrizlər və qida rasionundan bütöv məhsul qruplarının çıxarılması sağlamlığa zərər verə bilər. Onun sözlərinə görə, sağlamlıq üçün risk təkcə məhdudiyyətlərlə deyil, həm də həddindən artıq qidalanma ilə bağlıdır.
Mütəxəssislər həmçinin arıqlama dərmanlarının daha ucuz analoqları ilə əvəz edilməsinin də müəyyən risklər yaratdığını qeyd edirlər. Orijinal preparatlarla analoqlar arasındakı qiymət fərqi çox vaxt tərkib fərqlərindən qaynaqlanır. Bu komponentlərdən biri olan benzil spirti qaraciyər və böyrək funksiyaları pozulmuş şəxslərdə uzunmüddətli istifadə zamanı orqanizmdə toplana bilər və əlavə sağlamlıq problemlərinə səbəb ola bilər.
