Böyrək transplantasiyası son mərhələ böyrək çatışmazlığından əziyyət çəkən xəstələr üçün həyat keyfiyyətini əhəmiyyətli dərəcədə yaxşılaşdıran effektiv müalicə üsullarından biridir.

Aztibb.az xəbər verir ki, ümumi cərrah-transplantoloq Tariyel Nadirovun sözlərinə görə, müasir tibbdə orqan transplantasiyası zamanı yaş amili artıq mütləq əks göstəriş hesab edilmir.

Həkim bildirib ki, uzun müddət böyrək çatışmazlığı səbəbindən nefroloq nəzarətində olan 72 yaşlı pasiyentə dializ mərhələsinə çatmadan, yəni preemptiv böyrək transplantasiyası həyata keçirilib. Əməliyyatdan sonra donor ikinci gün, pasiyent isə altıncı gün sağlam vəziyyətdə evə buraxılıb.

Tariyel Nadirov vurğulayıb ki, transplantasiya qərarı verilərkən əsas meyar xəstənin yaşı deyil, ümumi sağlamlıq vəziyyətidir. Xüsusilə ürək-damar və tənəffüs sisteminin əməliyyata uyğun olması qiymətləndirilir. Bu göstəricilər qənaətbəxş olduqda, yaşlı şəxslərdə də böyrək transplantasiyasının uğurla həyata keçirilməsi mümkündür.

Mütəxəssisin sözlərinə görə, vaxtında aparılan qiymətləndirmə və düzgün seçilmiş müalicə taktikası sayəsində son mərhələ böyrək çatışmazlığı olan xəstələr dializə başlamadan da uğurla böyrək transplantasiyası oluna bilərlər.