Almaniyalı alimlərin araşdırması sağlam qidalanmanın müxtəlif modellərinin orqanizmin bioloji yaşlanmasının daha yavaş getməsi ilə əlaqəli olduğunu göstərib.

Aztibb.az www.sciencedaily.com-a istinadla bildirir ki, Almaniyanın Neyrodegenerativ Xəstəliklər Mərkəzinin (DZNE) tədqiqatçıları təxminən 7 500 nəfərin məlumatlarını təhlil edərək Aralıq dənizi, Skandinaviya, bitki mənşəli qidalanma, eləcə də qan təzyiqinin tənzimlənməsinə yönəlmiş DASH pəhrizi daxil olmaqla, 10 qidalanma modelini araşdırıblar.

Alimlər iştirakçıların qidalanma vərdişlərini qan nümunələrindəki DNT metilasiyası göstəriciləri ilə müqayisə ediblər. DNT-də baş verən bu kimyəvi dəyişikliklər genlərin fəaliyyətinin tənzimlənməsində rol oynayır və bioloji yaşın qiymətləndirilməsinə imkan verir.

Nəticələr göstərib ki, araşdırılan sağlam qidalanma modellərinə daha çox əməl edən şəxslərdə bioloji yaşlanma göstəriciləri daha əlverişli olub. Bununla belə, təsirin dərəcəsi qidalanma modelindən asılı olaraq dəyişib. Tədqiqatçılar həmçinin fərqli qidalanma modelləri ilə əlaqəli molekulyar dəyişikliklərin bir çoxunun oxşar bioloji proseslərdə birləşdiyini müəyyən ediblər.

Mütəxəsssislərin fikrincə, nəticələr sağlam qidalanma üçün vahid və hamıya uyğun ideal pəhrizin olmadığını göstərir. İnsanların fərdi ehtiyaclarına və həyat tərzinə uyğun sağlam qidalanma modelini seçməsi mümkün ola bilər.

Tədqiqatın nəticələri Nature Communications jurnalında dərc olunub. Müəlliflər vurğulayırlar ki, araşdırma qidalanma ilə bioloji yaşlanma arasında əlaqəni üzə çıxarsa da, səbəb-nəticə əlaqəsini qəti şəkildə sübut etmir.