Azərbaycan Tibb Universitetinin (ATU) Hərbi tibb fakültəsi və Tələbə Həmkarlar İttifaqı Komitəsinin İntellektual oyunlar klubunun birgə təşkilatçılığı ilə Zəfər Günü münasibətilə tələbə və kursantlar arasında “Kim? Harada? Nə zaman?” intellektual yarışı keçirilib. 

Universitetdən Aztibb.az-a bildirilib ki, yarış gənclərin intellektual səviyyəsinin yüksəldilməsi, məntiqi təfəkkürünün və dünyagörüşünün inkişaf etdirilməsi, eləcə də asudə vaxtlarının səmərəli təşkili məqsədi daşıyıb. 

Ümumilikdə 16 komandanın iştirak etdiyi turnir üç mərhələdə təşkil olunub. Yarış zamanı iştirakçılar dünyagörüşünü, məntiqi düşünmə və operativ qərar qəbuletmə bacarıqlarını sınayan sualları cavablandırıblar. Gərgin və maraqlı mübarizə şəraitində keçən oyun tələbə və kursantların bilik və bacarıqlarını nümayiş etdirmələri ilə yanaşı, onların komanda işi və əməkdaşlıq vərdişlərinin möhkəmləndirilməsinə də töhfə verib. 

Yarışın nəticələrinə əsasən, birinci yeri “Zəfər yolu” komandası, ikinci yeri “Zirvə” komandası, üçüncü yeri isə “Bayraqdar” komandası tutub. 

Turnirin sonunda qalib komandaların mükafatlandırılması mərasimi keçirilib. Tədbirdə ATU-nun Hərbi tibb fakültəsinin rəisi, tibb xidməti polkovniki Məharət Rzayev iştirak edib. Fərqlənən komandalara sertifikat və medallar təqdim olunub. Birinci yerin sahibi olan “Zəfər yolu” komandası isə turnirin baş mükafatı – xüsusi kubokla təltif edilib. 

Gələcəyin hərbi həkimləri və tibb mütəxəssislərinin biliklərinin artırılması, yaradıcı potensiallarının üzə çıxarılması, analitik düşünmə və qərar qəbuletmə bacarıqlarının inkişafı baxımından mühüm əhəmiyyət daşıyan tədbir Birləşmiş Millətlər Təşkilatının Dayanıqlı İnkişaf Məqsədlərinə də xidmət edir. İntellektual oyun bu hədəflərdən DİM 4 – Keyfiyyətli təhsil məqsədinə uyğun olaraq gənclərin bilik və bacarıqlarının inkişafına, qeyri-formal öyrənmə imkanlarının genişləndirilməsinə töhfə verir.