Mərkəzi Gömrük Hospitalının Mama-Ginekologiya şöbəsində qadın sağlamlığının qorunmasına kompleks yanaşma tətbiq olunur

30.10.2026 13:08

Mərkəzi Gömrük Hospitalının Mama-Ginekologiya şöbəsində qadınlara hamiləlik, doğuş və doğuşdan sonrakı mərhələlərdə, eləcə də qadın sağlamlığının qorunması, sağlam hamiləliyin təmin edilməsi və ginekoloji xəstəliklərin vaxtında aşkarlanması və müalicə olunmasında müasir tibbi xidmətlər göstərilir.

Bu məlumat Aztibb.az-a Mərkəzi Gömrük Hospitalından verilib.

Bildirilib ki, şöbənin rəisi, mama-ginekoloq Təranə Bayramova, mama-ginekoloqlar Sədi Allahverdiyev, Mehriban Əmirova, Nigar Məmmədova, Raziyyə Tapdıqova və Leyla Qaçayeva yüksəkixtisaslı mütəxəssisləri müasir diaqnostika və müalicə üsullarından istifadə etməklə qadın sağlamlığının qorunmasına, xəstəliklərin erkən aşkarlanmasına və fərdi müalicə yanaşmasının tətbiqinə xüsusi diqqət yetirirlər.

Hamiləliyin planlaşdırılmasından doğuşdan sonrakı müşahidəyədək

Mərkəzi Gömrük Hospitalının Mama-Ginekologiya şöbəsində hamiləlik öncəsi müayinələr, hamiləliyin gedişinin izlənilməsi, dölün inkişafının qiymətləndirilməsi, risklərin müəyyənləşdirilməsi və profilaktik tədbirlər həyata keçirilir. Tibbi göstərişlərə uyğun olaraq təbii doğuş və keysəriyyə əməliyyatı aparılır, doğuşdan sonra ana və körpənin vəziyyətinin izlənilməsi təmin edilir.

Hamiləliyin planlaşdırılması mərhələsində qadınların sağlamlıq vəziyyətinin qiymətləndirilməsi, mövcud risklərin müəyyənləşdirilməsi və zəruri müayinələrin aparılması ana və körpənin sağlamlığının qorunması baxımından mühüm əhəmiyyət daşıyır.

Ginekoloji xəstəliklərin diaqnostikası və müalicəsi

Şöbədə geniş yayılmış ginekoloji xəstəliklərin müayinə və müalicəsi, açıq və endoskopik cərrahi müdaxilələr, o cümlədən uşaqlıq miomalarının konservativ və cərrahi müalicəsi, yumurtalıq törəmələrinin endoskopik cərrahiyyəsi, polikistik yumurtalıq sindromunun müalicəsi, eləcə də uşaqlıq və sidik kisəsinin sallanması və sidik qaçırma problemlərinin idarə olunması üzrə tibbi xidmətlər göstərilir.

Müasir estetik və funksional ginekologiya xidmətləri

Mərkəzi Gömrük Hospitalının Mama-Ginekologiya şöbəsində tibbi göstərişlər və fərdi qiymətləndirmə əsasında estetik və funksional ginekologiya sahəsində də xidmətlər təqdim olunur. Müvafiq hallarda PRP, botulinum toksini və dolğu preparatlarının tətbiqi, eləcə də doğuşdan sonra yaranmış bəzi çapıq dəyişikliklərinin korreksiyası nəzərdən keçirilir. Şöbədə estetik və funksional ginekologiya sahəsində FEMILIFT fraksional CO₂ lazer texnologiyasından istifadə olunur.