Tez-tez nəcis ifrazı ehtiyacı, düz bağırsaqda ağrı və tam boşalmama hissi proktitdən xəbər verə bilər.

Aztibb.az xəbər verir ki, cərrah-proktoloq, endoskopist Anar Əliyev düz bağırsağın selikli qişasının iltihabı olan proktitin əlamətləri, yaranma səbəbləri və müalicə zamanı diqqət yetirilməli məqamlar barədə məlumat verib.

Proktit düz bağırsağın selikli qişasının iltihabıdır. Bu vəziyyət zamanı insan tez-tez və təcili nəcis ifrazı ehtiyacı hiss edə bilər. Lakin tualetə getdikdə ifrazatın az miqdarda olması və ya bağırsağın tam boşalmadığı hissinin yaranması mümkündür.

Proktitin əsas əlamətlərinə tez-tez nəcis ifrazı istəyi, düz bağırsaqda ağrı və narahatlıq, selik və ya qan gəlməsi, eləcə də ifrazatdan sonra belə davam edən çağırış hissi daxildir.

Proktit müxtəlif səbəblərdən, o cümlədən infeksiyalar və iltihabi bağırsaq xəstəlikləri nəticəsində yarana bilər. Buna görə də müalicəyə başlamazdan əvvəl iltihabın səbəbinin müəyyənləşdirilməsi vacibdir. Özbaşına antibiotik və ya şam preparatlarından istifadə etmək düzgün deyil.

Əlamətlər təkrarlanırsa və ya uzun müddət davam edirsə, proktoloqa müraciət etmək tövsiyə olunur. Güclü ağrı, çoxlu qanaxma və ya yüksək hərarət müşahidə edildikdə isə təcili tibbi qiymətləndirmə tələb olunur.