Uzunmüddətli stress və ya intensiv iş rejimindən sonra “dopamin çuxuru” adlandırılan vəziyyət yarana bilər. Lakin bu ifadə tibbi diaqnoz hesab olunmur.

Aztibb.az "Medikforum"a istinadən yazır ki, psixoloq Alyona Artamonova apatiyanı aradan qaldırmaq və motivasiyanı bərpa etmək üçün yeddi addım təklif edib.

Mütəxəssis ilk növbədə yuxu rejimini qaydaya salmağı və gündə 7–8 saat yatmağı, həmçinin müntəzəm fiziki hərəkətliliyi artırmağı tövsiyə edib. Fiziki yük tədricən artırılmalıdır. İlkin mərhələdə sürətli addımlarla gəzinti kifayət edə bilər.

Növbəti addım qısa videolara və sosial şəbəkələrə sərf olunan vaxtı azaltmaq, eləcə də özünü daim başqaları ilə müqayisə etmək vərdişindən imtina etməkdir.

Gündəlik həyata marağın bərpasında canlı ünsiyyət və yaxınların dəstəyi də mühüm rol oynayır. Psixoloq böyük və çətin tapşırıqlar siyahısı hazırlamaq əvəzinə, kiçik və yerinə yetirilməsi mümkün olan məqsədlər müəyyənləşdirməyi məsləhət görüb. Belə ki, əldə olunan kiçik uğurlar motivasiyanın qorunmasına kömək edir.

Digər mühüm addım qidalanmanı balanslaşdırmaq və alkoqol qəbulunu azaltmaqdır.

Bu tədbirlər nəticə vermədikdə vəziyyətin səbəblərini müəyyənləşdirmək və vərdişləri dəyişmək üçün psixoloji yardıma müraciət etmək tövsiyə olunur. Mütəxəssis müsahibəsində vurğulayıb ki, davamlı apatiya, hərəkət pozuntuları və ya nəzərəçarpan depressiv əlamətlər müşahidə edildikdə həkimə müraciət etmək vacibdir.