Şirvan Şəhər Mərkəzi Xəstəxanasının həkim-otorinolarinqoloqu Şəbnəm Mustafazadə Aztibb.az-a otit (qulaq iltihabı), onun növləri, yaranma səbəbləri və xəstəliklə bağlı yanlış təsəvvürlər barədə məlumat verib.

 

Şəbnəm Mustafazadə bildirib ki, otit qulağın iltihabıdır. Otit üç əsas növü var. Xarici otit: Xarici qulaq keçəcəyinin və qulaq seyvanının iltihabıdır. Xarici qulağın iltihabı travma, normal floranın dəyişməsi nəticəsində yarana bilər.

Orta otit: Qulaq pərdəsinin arxasında yerləşən orta qulaq boşluğunun iltihabıdır. Əksər hallarda yuxarı tənəffüs yollarının infeksiyalarından, xüsusilə zökəmdən sonra inkişaf edir.

Daxili qulaq iltihabı (labirintit): Daxili qulağın iltihabıdır. Başgicəllənmə, tarazlığın pozulması və ürəkbulanma kimi əlamətlərlə müşayiət oluna bilər.

 

O, yanlış təsəvvürlər və doğru yanaşmalar barədə də danışaraq qeyd edib ki, həkim müayinəsindən keçmədən aptekdən dərman alıb qulağa tökmək olmaz. Eləcə də qulaq ağrısının səbəbi müəyyənləşdirilmədən özbaşına damcı istifadə etmək olmaz. Xüsusilə qulaq pərdəsinin deşilməsi zamanı bəzi damcılar daxili qulağa zərər verə bilər. Buna görə dərman seçimi həkim tərəfindən aparılmalıdır.

 

"Qulaq ağrısı, axıntı, eşitmənin zəifləməsi və ya başgicəllənmə müşahidə olunduqda vaxtında həkimə müraciət etmək vacibdir", - deyə Şəbnəm Mustafazadə vurğulayıb.