Təxminən 200 min nəfərin məlumatlarının təhlil edildiyi araşdırma gec saatlarda yemək yeməklə qaraciyər xəstəlikləri arasında əlaqə olduğunu üzə çıxarıb.

Aztibb.az "Clinical Gastroenterology and Hepatology" jurnalında dərc olunan məqaləyə istinadən yazır ki, ABŞ-ın Oreqon Sağlamlıq və Elm Universitetinin (OHSU) tədqiqatçıları müəyyən ediblər ki, axşam yeməyindən sonra və ya yatmazdan əvvəl müntəzəm qidalanan insanlarda qaraciyər piylənməsi və sirroz riski daha yüksək ola bilər. Nəticələrə görə, gec saatlarda yemək yeyənlərdə bu xəstəliklərin rastgəlmə göstəricisi belə vərdişi olmayanlarla müqayisədə 20–30 faiz yüksək olub.

Tədqiqatın aparıcı müəllifi, qaraciyər xəstəlikləri və transplantasiyası üzrə mütəxəssis Robert Vileçanski bildirib ki, qaraciyər orqanizmin bioloji saatı ilə sıx əlaqəlidir. Buna görə də qidalanma vaxtının dəyişdirilməsi, qəbul edilən qidaların tərkibi dəyişməsə belə, sağlamlığa təsir göstərə bilər.

Alimlərin fikrincə, orqanizm yuxuya hazırlaşdığı zaman qida qəbul etmək maddələr mübadiləsinə təsir göstərə bilər. Bu vərdişin uzun müddət davam etməsi piylənmə, diabet və qaraciyər sağlamlığının pozulması ilə əlaqəli ola bilər.

Bununla belə, tədqiqat gec saatlarda yeməyin birbaşa qaraciyər xəstəliklərinə səbəb olduğunu sübut etmir. Nəticələr yalnız bu vərdişlə xəstəliklər arasında əlaqəni göstərir.

Tədqiqatçılar qidalanma vaxtını daha erkən saatlara çəkməyin qaraciyər sağlamlığına təsirini dəqiqləşdirmək üçün əlavə araşdırmalar aparmağı planlaşdırırlar.