Qazaxıstanda hazırlanmış DVC şişəleyhinə preparatı klinik sınaqların ikinci mərhələsindən keçir. Tərtibatçılar zəruri prosedurları 2026-cı ilin sonunadək başa çatdırmağı və preparatı qeydiyyata təqdim etməyi planlaşdırırlar. Bu barədə Qazaxıstanın Elm və Ali Təhsil naziri Səyasət Nurbek məlumat verib.

Aztibb.az "Pharmnews"a istinadən yazır ki, klinik tədqiqatlar Astanada Milli Elmi Onkologiya Mərkəzinin bazasında aparılır. Hazırkı mərhələdə mütəxəssislər preparatın optimal dozasını müəyyənləşdirir və pasiyentlərin müxtəlif dozalara reaksiyasını qiymətləndirirlər.

Sınaqlar başa çatdıqdan sonra əldə olunan nəticələrin ekspertizaya təqdim edilməsi planlaşdırılır. Daha sonra preparat Dərman Vasitələrinin Milli Ekspertiza Mərkəzi vasitəsilə dövlət qeydiyyatı prosedurundan keçməlidir.

Səyasət Nurbekin sözlərinə görə, zəruri prosedurlar uğurla başa çatdırılarsa, preparat 2027-ci ildə Qazaxıstanda istifadəyə verilə bilər.

İlkin mərhələdə DVC-nin Qazaxıstanda və Avrasiya İqtisadi İttifaqı ərazisində istifadəsi üçün qeydiyyata alınması planlaşdırılır. Digər bazarlara çıxmaq üçün isə tərtibatçılar müvafiq ölkələrin tələblərinə uyğun qeydiyyat prosedurlarından keçməli olacaqlar.

DVC-nin pasiyentlər üzərində klinik sınaqları 2026-cı ildə başlayıb. Bundan əvvəl tərtibatçılar preparatın klinikadan əvvəlki tədqiqatlarını başa çatdırıblar.