Generativ süni intellekt çat-botları istifadəçilərdə empatiya və anlayış hissi yarada bilsə də, onların psixoterapevti əvəz edə biləcək qədər təhlükəsiz və effektiv olduğu hələ sübut edilməyib.

Aztibb.az xəbər verir ki, npj Digital Medicine jurnalında dərc olunan sistematik icmalda 21 tədqiqatın nəticələri təhlil edilib. 2023–2025-ci illərdə Çin, ABŞ və Böyük Britaniyada aparılan araşdırmalar əsasən depressiya və narahatlıq hallarına yönəlib.

İştirakçılar çat-botlarla ünsiyyəti rahat, əlçatan və fərdiləşdirilmiş hesab ediblər. Lakin tədqiqatların əksəriyyətinin yalnız 2–8 həftə davam etməsi uzunmüddətli effektivlik və təhlükəsizlik barədə nəticə çıxarmağa imkan vermir.

Mütəxəssislər həmçinin İİ-nin yanlış və ya potensial təhlükəli məlumat verməsi, konteksti düzgün anlamaması və böhran vəziyyətlərində, o cümlədən intihar düşüncələri və panik atak zamanı adekvat reaksiya verə bilməməsi ilə bağlı risklərə diqqət çəkirlər.

Araşdırma müəllifləri psixiatriyada İİ tətbiqləri üçün vahid qiymətləndirmə standartlarının hazırlanmasını, klinisyenlərin prosesə cəlb edilməsini, məlumatların şəffaflığını və müstəqil təhlükəsizlik auditlərinin aparılmasını vacib hesab edirlər.

Nəticələr göstərir ki, İİ çat-botları psixi sağlamlıq xidmətlərinə əlavə vasitə kimi perspektivli olsa da, hazırda onları peşəkar psixoterapiyanın tam əvəzi hesab etmək üçün kifayət qədər elmi dəlil yoxdur.