ATU-nun Ağız və üz-çənə cərrahiyyəsi kafedrasının müdiri, Tədris Cərrahiyyə Klinikasının üz-çənə cərrahı, professor Çingiz Rəhimov tərəfindən II sinif skelet anomaliyasının korreksiyası məqsədilə xəstə üzərində ortognatik cərrahiyyə əməliyyatı icra olunub.

Professor Çingiz Rəhimovun Aztibb.az-a bildiriyinə görə, ortognatik cərrahiyyə dişləmənin, eləcə də çənə sümüklərinin düzgün anatomik mövqeyinin bərpasına yönəlmiş cərrahi müalicə üsuludur. Bu əməliyyatlar çənə sümüklərinin inkişafında və qarşılıqlı münasibətində yaranmış skelet anomaliyalarının korreksiyasına imkan verir.

Əməliyyat icra olunan xəstədə II sinif skelet anomaliyası müşahidə olunub. Bu patologiya zamanı üst çənənin alt çənəyə nisbətən ön mövqedə olması və ya alt çənənin inkişafının geridə qalması nəticəsində çənələr arasında uyğunsuzluq yaranır. Xəstədə də əsas problem alt çənənin geridə yerləşməsi ilə xarakterizə olunub.

Çənələr arasındakı bu uyğunsuzluq həm funksional, həm də estetik problemlərə səbəb ola bilər. Estetik baxımdan alt çənənin geridə yerləşməsi üz profilində nəzərəçarpan dəyişiklik yaradır. Funksional baxımdan isə dişlərin düzgün qapanmaması nəticəsində çeynəmə funksiyası pozula, çənə-üz nahiyəsinin strukturlarına, o cümlədən temporomandibulyar oynağa əlavə yük düşə bilər.
Mütəxəssisin bildirdiyinə görə, xəstənin ortognatik cərrahiyyəyə hazırlıq mərhələsi təxminən bir il davam edib. Bu müddət ərzində ortodontik müalicə aparılıb, dişlərin və diş sıralarının əməliyyata uyğun vəziyyətə gətirilməsi, həmçinin mövcud patologiyaların aradan qaldırılması istiqamətində mərhələli hazırlıq həyata keçirilib.
Ortognatik müalicədə multidissiplinar yanaşma xüsusi əhəmiyyət daşıyır. Müalicənin uğurlu nəticəsi üçün ortodont və ağız-üz çənə cərrahının birgə fəaliyyəti vacibdir. Bu əməkdaşlıq nəticəsində xəstənin müalicə planı fərdi şəkildə hazırlanır, ortodontik və cərrahi mərhələlər ardıcıl şəkildə həyata keçirilir.
İcra olunan ortognatik cərrahiyyənin əsas məqsədi çənələr arasındakı skelet uyğunsuzluğunu aradan qaldırmaq, dişləməni və çeynəmə funksiyasını yaxşılaşdırmaq, eyni zamanda üz profilinin harmonikliyini bərpa etməkdir.