Demensiyadan əziyyət çəkən insanların xəstəlik səbəbindən yeni bacarıqlar öyrənə bilmədiyi fikri doğru deyil. İsveçli alim Elias İngebrandın araşdırması göstərib ki, bu şəxslər yaddaş pozuntuları ciddi olsa belə, yeni fəaliyyətlərə uyğunlaşa və müəyyən bacarıqları mənimsəyə bilirlər.

Aztibb.az xəbər verir ki, Linköpinq Universitetində aparılan tədqiqatda 10 demensiyalı şəxs ilk dəfə planşetdən istifadə edib. İştirakçılara yalnız planşetdən istədikləri kimi istifadə etmək tapşırılıb. 4–6 həftə davam edən araşdırma zamanı onların cihazdan getdikcə daha müstəqil istifadə etməyə başladığı müşahidə olunub.

Alimlərin fikrincə, maraq və şəxsi motivasiya öyrənmə prosesində mühüm rol oynayır. Məsələn, əvvəllər idman oriyentiri ilə məşğul olan iştirakçı planşetdən yarış nəticələrini yoxlamaq üçün istifadə edib. Digər bir iştirakçı isə İsveçin ictimai televiziya arxivindən istifadə etməyi öyrənərək daha sakit və diqqətli davranmağa başlayıb.

Tədqiqat zamanı demensiyalı şəxslərin bir-birindən öyrənə bildiyi və bəzi hallarda personalın və ya yaxınlarının köməyi olmadan problemləri həll etdiyi də müəyyənləşdirilib.

Alim hesab edir ki, nəticələr demensiyalı şəxslərin imkanlarına dair mövcud stereotiplərin dəyişdirilməsinə və onların gündəlik həyatında yeni öyrənmə imkanlarından istifadə olunmasına kömək edə bilər.