Türkiyənin nüfuzlu ali təhsil müəssisələrindən biri olan Üsküdar Universitetinin bir qrup tələbəsi Azərbaycan Tibb Universitetində (ATU) iki aylıq kliniki təcrübə proqramını uğurla başa vurub.
Bu barədə Aztibb.az-a ATU-dan məlumat verilib.
Bildirilib ki, beynəlxalq əməkdaşlıq çərçivəsində təşkil olunan proqram tələbələrin nəzəri biliklərini praktik bacarıqlarla möhkəmləndirməsinə, müasir klinik yanaşmalarla tanış olmasına və xəstələrlə iş prosesini yaxından müşahidə etməsinə geniş imkan yaradıb.
İki ay ərzində Üsküdar Universitetinin 8 tələbəsi ATU-nun I Daxili xəstəliklər, I Cərrahi xəstəliklər və Ağciyər xəstəlikləri kafedralarında kliniki təcrübədə iştirak edib. Təcrübə müddətində tələbələr həkimlərin gündəlik fəaliyyətini müşahidə edib, klinik proseslərdə yaxından iştirak edib, xəstələrin müayinəsi və müalicəsinin təşkili ilə bağlı praktik bilik və bacarıqlarını inkişaf etdiriblər.
Proqramın əsas məqsədlərindən biri tələbələrin müxtəlif klinik vəziyyətlər üzrə təcrübə qazanması, peşəkar biliklərini zənginləşdirməsi və beynəlxalq tibbi təcrübə mübadiləsində iştirak etməsidir.
Qeyd edək ki, Azərbaycan Tibb Universiteti beynəlxalq əlaqələrin genişləndirilməsinə, xarici ali təhsil müəssisələri ilə əməkdaşlığın inkişaf etdirilməsinə və tələbə mübadiləsi proqramlarının həyata keçirilməsinə xüsusi önəm verir. Bu istiqamətdə həyata keçirilən layihələr tələbələrin peşəkar inkişafına töhfə verməklə yanaşı, Azərbaycan və xarici ölkələrin tibb təhsili müəssisələri arasında akademik və elmi əlaqələrin daha da möhkəmlənməsinə xidmət edir.
