Özəl xəstəxanalarda ən təhlükəli problemlər bəzən görünməyən risklərdən qaynaqlanır. Pasiyentin fərq etmədiyi, lakin sistemin vaxtında müəyyən etməli olduğu bu risklər səhiyyə idarəçiliyində xüsusi əhəmiyyət daşıyır.

Aztibb.az Dr. Cəbrayıl Abbasovun ekspert açılqamasını təqdim edir:

Gizli risklər necə aşkarlanır?

Ekspert qeyd edir ki, özəl xəstəxanalarda gizli risklərin vaxtında aşkarlanması üçün ilk növbədə klinik auditlər həyata keçirilir. Daha sonra daxili nəzarət sistemləri vasitəsilə proseslər davamlı şəkildə izlənilir. Elektron tibbi qeydiyyatların analizi mümkün riskləri əvvəlcədən müəyyən etməyə imkan yaradır.

Onun sözlərinə görə, infeksiya nəzarət protokollarının düzgün tətbiqi xəstəxanadaxili təhlükələrin qarşısının alınmasında mühüm rol oynayır. Eyni zamanda tibbi səhvlər və gecikmələr xüsusi monitorinq sistemi ilə nəzarətdə saxlanılır. Risk komitələrinin müntəzəm iclaslarında isə mövcud vəziyyət təhlil olunur və qabaqlayıcı qərarlar qəbul edilir.

Ekspert vurğulayır ki, pasiyent məmnuniyyəti və şikayətlərin təhlili də risklərin müəyyən edilməsində vacib göstəricilərdən biridir. Bundan əlavə, 7/24 məlumat axınının davamlı izlənməsi xəstəxana sisteminin təhlükəsiz və çevik idarə olunmasına şərait yaradır.

"Müasir xəstəxana artıq yalnız müalicə aparan müəssisə deyil. O, eyni zamanda riskləri əvvəlcədən görən, təhlil edən və qarşısını alan canlı idarəetmə sistemidir. Çünki səhiyyədə uğur yalnız düzgün diaqnoz qoymaqdan ibarət deyil. Əsl uğur potensial təhlükəni problemə çevrilməzdən əvvəl müəyyən etməkdir. Güclü xəstəxananı fərqləndirən əsas xüsusiyyət də məhz budur: problemi baş verdikdən sonra deyil, baş verməmişdən əvvəl görmək", - deyə Dr. Cəbrayıl Abbasov yekunlaşdırıb.