Yaponiyanın Nara Tibb Universitetinin professoru Hiromi Sakainin rəhbərlik etdiyi tədqiqat qrupu eritrositləri əvəz edə biləcək hemoglobin vezikulları (HbV) texnologiyasını hazırlayıb.

Aztibb.az "Pharm.doc"un məlumatına istinadən yazır ki, bu yanaşmada alimlər istifadə müddəti başa çatmış donor qanından hemoglobini ayıraraq onu qoruyucu lipid qişası daxilində yerləşdirirlər. Nəticədə oksigen daşıya bilən süni eritrosit analoqu əldə edilir.

Yeni texnologiyanın əsas üstünlükləri bunlardır:

Bütün qan qrupları üçün uyğundur. Lipid qişasının səthində qan qrupunu müəyyən edən antigen zülalları olmadığından məhsulun immun rədd reaksiyası yaratma riski xeyli azalır.

Uzunmüddətli saxlanma imkanı. Preparat dondurulmadan otaq temperaturunda 2 il, soyuducuda isə 5 ilədək öz xüsusiyyətlərini qoruyur. Müqayisə üçün qeyd edək ki, adi donor qanı təxminən 42 gün saxlanıla bilir.

Klinik sınaq mərhələsindədir. Hazırda texnologiya klinik tədqiqatlardan keçir. Mütəxəssislərin planına əsasən, uğurlu nəticələr əldə olunacağı təqdirdə onun geniş klinik tətbiqinə 2030-cu ildən başlanılması nəzərdə tutulur.

Əgər texnologiya klinik sınaqlarda gözlənilən nəticələri doğruldarsa, HbV preparatları təcili yardım, hərbi tibb, təbii fəlakətlər və donor qanının məhdud olduğu hallarda qan köçürməsinə alternativ həll kimi mühüm rol oynaya bilər.