Bu barədə Aztibb.az-a məlumat verən Mirəli Məcidovun sözlərinə görə, pasiyent klinikaya uzun müddətdir davam edən təngnəfəslik, döş qəfəsində ağrılar, fiziki yüklənmə zamanı tez yorulma və ürək çatışmazlığı əlamətləri ilə müraciət edib. Aparılan klinik, laborator və instrumental müayinələr, o cümlədən exokardioqrafiya və koronar angioqrafiya nəticəsində xəstədə ağır dərəcəli aortal qapaq patologiyası və koronar arteriyaların çoxdamarlı zədələnməsi müəyyən edilib.

 

Pasiyentin vəziyyətinə görə cərrahi müdaxilənin ən optimal müalicə üsulu olduğu qənaətinə gəlinib. Əməliyyat zamanı süni qan dövranı şəraitində aortal qapağın protezləşdirilməsi və eyni seansda koronar arteriyaların aortokoronar şuntlama əməliyyatı icra olunub.

 

Əməliyyat plan üzrə, ağırlaşma olmadan başa çatdırılıb. Erkən postoperativ dövrdə pasiyentin hemodinamik göstəriciləri stabil olub, ürəyin nasos funksiyası qənaətbəxş qiymətləndirilib.

 

Mirəli Məcidov bildirib ki, koronar arteriyaların çoxdamarlı zədələnməsi və ürək qapaq xəstəlikləri vaxtında diaqnostika və düzgün seçilmiş cərrahi taktika tətbiq edilmədikdə həyat üçün ciddi risk yarada bilər. Bu səbəbdən döş qəfəsində ağrı, təngnəfəslik, fiziki aktivlik zamanı halsızlıq və digər ürək mənşəli şikayətlər olduqda gecikmədən ixtisaslaşmış tibb müəssisəsinə müraciət etmək tövsiyə olunur