Bu barədə Aztibb.az-a məlumat verən Şirvan Şəhər Mərkəzi Xəstəxanasının həkim-fizioterapevti Xəyalə Nəsirova bildirib ki, müasir elmi araşdırmalar göstərir ki, fizioterapiya ağrının azaldılması, hərəkət imkanlarının yaxşılaşdırılması və həyat keyfiyyətinin yüksəldilməsində mühüm rol oynayır. Manual terapiya, terapevtik məşqlər, elektroterapiya, pasiyentin maarifləndirilməsi və multidissiplinar reabilitasiya yanaşmaları sübuta əsaslanan müalicənin əsas komponentləridir. Fərdiləşdirilmiş fizioterapiya proqramları isə xroniki bel ağrısının müalicəsində ən effektiv qeyri-cərrahi üsullardan biri hesab olunur.

 

Onun sözlərinə görə, bel ağrısının yaranmasına degenerativ dəyişikliklər, zəif əzələ korseti, uzunmüddətli oturaq həyat tərzi, düzgün olmayan bədən duruşu, artıq çəki, peşə yüklənmələri və psixososial amillər təsir göstərə bilər:

"Müasir klinik tövsiyələrə əsasən, terapevtik məşqlər ağrının azalmasına və funksional vəziyyətin yaxşılaşmasına kömək edən ən təsirli qeyri-dərman müalicə üsullarındandır. Manual terapiya düzgün seçilmiş pasiyentlərdə məşq proqramı ilə birlikdə tətbiq olunduqda daha effektiv nəticə verir. Elektroterapiya isə əsas müalicəni tamamlayan yardımçı vasitə kimi istifadə edilir".

 

Xəyalə Nəsirova qeyd edib ki, uğurlu müalicənin əsas şərti hər bir pasiyentə fərdi yanaşmanın tətbiq edilməsidir. Pasiyentin klinik vəziyyəti, funksional imkanları və gündəlik həyat tərzi nəzərə alınmaqla hazırlanan reabilitasiya proqramı daha uğurlu nəticələr verir. Pasiyentin müalicə prosesində fəal iştirakı, terapevtik məşqləri müntəzəm yerinə yetirməsi və sağlam həyat tərzi vərdişlərinə əməl etməsi ağrının azalmasına, hərəkət funksiyasının bərpasına və xəstəliyin təkrarlanma riskinin minimuma enməsinə mühüm töhfə verir.

 

"Unutmayaq ki, fizioterapiya yalnız ağrının aradan qaldırılmasına deyil, həm də insanın funksional müstəqilliyinin, həyat keyfiyyətinin və sosial aktivliyinin bərpasına xidmət edən kompleks elmi yanaşmadır", - deyə həkim əlavə edib.