Azərbaycan Respublikasının səhiyyə naziri cənab Teymur Musayev tərəfindən Mərkəzi Klinikanın bir qrup əməkdaşı ölkəmizdə və bütövlükdə Cənubi Qafqaz regionunda ilk dəfə meyit donorundan ürək transplantasiyası əməliyyatlarını uğurla icra etdiklərinə, eləcə də Tibb İşçilərinin Peşə Bayramı Günü münasibətilə Fəxri fərmanla təltif olunub.

Bu barədə Aztibb.az-a Klinikadan xəbər verilib.

Bu münasibətlə Mərkəzi Klinikada təltif olunan əməkdaşlarla görüş keçirilib. Tədbirdə baş həkim, professor Kamran Musayevin rəhbərlik etdiyi ixtisaslaşmış tibbi komandanın üzvləri – ürək-damar cərrahları Nigar Kazımzadə və Kamran Əhmədov, kardioreanimatoloq Kamran Nağızadə, kardioloq Oktay Musayev, anestezioloq Asəf Məmmədov və digər əməkdaşlar iştirak ediblər.

Mərkəzi Klinikanın Baş direktoru Həsən Qəndilov Fəxri fərmanları təqdim edərək əməkdaşları təbrik edib. O bildirib ki, bu yüksək dövlət təltifi yalnız mükafatlandırılan mütəxəssislərin əməyinə verilən qiymət deyil, həm də Mərkəzi Klinikanın kollektivinin ölkə səhiyyəsinin inkişafına verdiyi töhfəyə göstərilən etimadın ifadəsidir.

Baş direktor əldə olunan uğurlarda göstərdiyi dəstəyə görə Xüsusi Tibb Xidmətinin rəisi, akademik Cəmil Əliyevə, səhiyyə naziri cənab Teymur Musayevə və Orqan Donorluğu və Transplantasiyası üzrə Koordinasiya Mərkəzinə minnətdarlığını ifadə edib.
Professor Musayev təltif olunan əməkdaşlar adından təşəkkürünü bildirərək vurğulayıb ki, təbabətinin ən mürəkkəb əməliyyatlarından hesab olunan ürək transplantasiyasının uğurla icrası yüksək texnoloji təminat, peşəkar mütəxəssislər, multidissiplinar komanda işi və güclü təşkilati koordinasiya tələb edir. Onun sözlərinə görə, əldə olunan nəticələr Mərkəzi Klinikanın və Azərbaycan səhiyyəsinin beynəlxalq tibbi standartlara uyğun inkişafının bariz göstəricisidir.

Tədbir səmimi müzakirələr və xatirə şəkillərinin çəkilməsi ilə başa çatıb.