ATU-nun Tədris Cərrahiyyə Klinikasında Qulaq, burun, boğaz kafedrasının dosenti Cabbar Cəlilov tərəfindən burun tənəffüsünün pozulmasından əziyyət çəkən pasiyent üzərində müasir endoskopik cərrahi əməliyyat uğurla icra olunub.

Klinikadan Aztibb.az-a verilən xəbərə görə, müayinələr zamanı pasiyentdə hər iki aşağı burun balıqqulağının (konxaların) böyüməsi, burun girəcəyinin daralması və burun çəpərinin sola əyriliyi aşkarlanıb. Aparılan əməliyyat zamanı aşağı burun balıqqulaqlarının selikli qişası və fizioloji funksiyası qorunmaqla onların həcmi xüsusi cərrahi üsulla kiçildilib. Daha sonra burun çəpərinin əyriliyinin aradan qaldırılması məqsədilə septoplastika əməliyyatı icra olunub.

Həkimin sözlərinə görə, tətbiq olunan metodun üstünlüyü burun selikli qişasını zədələmədən burun boşluğunun anatomik quruluşunu bərpa etmək, hava axınını normallaşdırmaq və pasiyentin burun tənəffüsünü yaxşılaşdırmaqdır. Əməliyyatdan sonra sağalma prosesi mərhələli şəkildə gedir və təxminən iki ay ərzində burun tənəffüsü tam bərpa olunur.

Əməliyyat endoskopik görüntüləmə altında həyata keçirilib. Bu üsul yalnız cərrahi müdaxilənin dəqiqliyini artırmır, eyni zamanda Tədris Cərrahiyyə Klinikasının tədris imkanları sayəsində əməliyyatın monitor vasitəsilə tələbələr tərəfindən canlı izlənilməsinə şərait yaradır. Bu da gələcək həkimlərin praktiki bilik və bacarıqlarının artırılmasına mühüm töhfə verir.

Mütəxəssis bildirib ki, burun tənəffüsünün pozulmasına daha çox burun çəpərinin əyriliyi, aşağı burun balıqqulaqlarının böyüməsi və digər anatomik dəyişikliklər səbəb olur. Belə problemlər uşaqlıq yaşlarından müşahidə olunsa da, yeniyetmə və böyüklərdə də rast gəlinir. Xəstələrin hər biri fərdi qiymətləndirilir və cərrahi müdaxilə barədə qərar fərdi yanaşma əsasında verilir.

Əməliyyatda anestezioloji təminatı Qulaq, burun, boğaz kafedrasının dosenti Esmira Nəsibova həyata keçirib. Əməliyyat komandasında kafedranın assistenti Aynur Sücəddinova və rezident Xəyalə Mirzəyeva da iştirak ediblər.