Naxçıvan Dövlət Universitetində (NDU) “İnnovativ stomatologiyada müalicə protokolları” mövzusunda beynəlxalq konfrans keçirilib.
Konfransdan əvvəl iştirakçılar ümummilli lider Heydər Əliyevin abidəsini ziyarət ediblər.
Naxçıvan Muxtar Respublikası Səhiyyə Nazirliyi, Naxçıvan Dövlət Universiteti və Azərbaycan İmplantoloq İctimai Birliyinin birgə təşkilatçılığı ilə baş tutan konfransda giriş nitqi ilə çıxış edən universitetin rektoru Elbrus İsayev diqqətə çatdırıb ki, ali təhsil müəssisəsində bu cür beynəlxalq konfransların keçirilməsi, müxtəlif dərnək və qurumlarla görüşlərin təşkil olunması ənənəsi peşəkar kadr hazırlığına xidmət edən mühüm amillərdən biridir.
Rektor ali təhsil müəssisəsində stomatologiya sahəsində tədrisin yüksək səviyyədə təşkili, təcrübi vərdişlərə yiyələnmək məqsədilə yaradılan “Stomatoloji simulyasiya kabinəsi”, universitet xəstəxanasında istifadəyə verilən stomatoloji kabinələr haqqında iştirakçıları məlumatlandırıb.
Ölkəmizdə ilk dəfə Naxçıvan Dövlət Universitetində baş tutan I Beynəlxalq Tibbi Forum çərçivəsində ali təhsil ocağının genişlənən əlaqələrinə toxunan Elbrus İsayev Türkiyənin beynəlxalq arenada öz sözünü deyən universitetləri ilə qarşılıqlı əməkdaşlıq münasibətlərindən söz açıb. Bildirib ki, tələbələr qardaş ölkənin müxtəlif profilli universitetlərində təcrübə prosesini davam etdirir, stomatoloq həkimlər və tələbələr mütəmadi olaraq müxtəlif respublika və beynəlxalq miqyaslı konfranslarda, simpoziumlarda, layihələrdə iştirak edirlər.
Rektor muxtar respublikada stomatologiyanın inkişafında Azərbaycan İmplantoloq İctimai Birliyinin xüsusi rolu olduğunu nəzərə çatdıraraq, konfransın işinə uğurlar arzulayıb.
Naxçıvan Muxtar Respublikasında səhiyyənin inkişafından və Naxçıvan Dövlət Universitetinin bu sahədə peşəkar kadr hazırlığından bəhs edən Azərbaycan İmplantoloq İctimai Birliyinin sədri, tibb üzrə fəlsəfə doktoru Cabbar Həsənov davamlı tibbi təhsilin önəmini vurğulayıb. O, son dövrlər muxtar respublika səhiyyəsində kadr və texniki cəhətdən inkişafın nəzərə çarpacaq dərəcədə olduğunu bildirib.
Tədbirdə “Klinik təcrübədə endodontik protokollar”, “Endodontik müalicəli dişlərdə müasir restavrasiyalar”, “Təməl implant cərrahiyyəsində protokollar”, “Apikal rezeksiyalar”, “Qeyri-cərrahi parodontal müalicə yanaşması: Doğru diaqnostika” və digər mövzularda məruzələr dinlənilib.
Sonda iştirakçıları maraqlandıran suallar cavablandırılıb.
