Azərbaycan Tibb Universitetinin (ATU) tədris proqramları beynəlxalq akkreditasiyadan uğurla keçib. Akkreditasiya prosesi Dünya Tibb Təhsili Federasiyası tərəfindən 2017-ci ildən etibarən tanınan Akkreditasiya və Reytinq üzrə Müstəqil Agentlik (IAAR) tərəfindən aparılıb.

Aztibb.az xəbər verir ki, həmin mövzuya həsr edilmiş tədbirdə universitetin rektoru, professor Gəray Gəraybəyli çıxış edərək ATU-nun beynəlxalq akkreditasiyanı keçməsinin əhəmiyyəti, prosesin özü barədə məlumat verib. Qeyd edib ki, ATU-nun tədris proqramlarının akkreditasiya olunması diplomların dünyada tanınma coğrafiyasının genişləndirilməsi istiqamətində mühüm addımlardan biridir: “Beynəlxalq akkreditasiya ali məktəbin tanınmasında mühüm rol oynayır və zamanın tələbinə çevrilib. Bu proseduru ali məktəblərin öz proqramlarını təkmilləşdirməsi üçün qiymətləndirmə kimi qəbul etmək olar. Digər tərəfdən, akkreditasiya almayan universitetlər diplomlarının beynəlxalq səviyyədə tanınmasında müəyyən problemlər yaşaya bilərlər”.

Toplantıda çıxış edən IAAR-ın məsləhətçisi, professor Olqa Yanovskaya IAAR tərəfindən həm institusional, həm də tədris proqramlarının akkreditasiyasının aparıldığını qeyd edib. Bildirilib ki, həmin agentlik MDB ölkələri məkanında Dünya Tibb Təhsili Federasiyası tərəfindən tanınan ilk qurumdur. IAAR tərəfindən akkreditasiya olunan universitetlər və tədris proqramları Dünya Tibb Təhsili Federasiyasının akkreditasiyasını əldə etmiş sayılırlar.

O.Yanovskaya bildirib ki, akkreditasiya prosesi çərçivəsində ötən il noyabrın 21-dən 25-dək agentliyin Xarici Ekspert Komissiyası Bakıya səfər edərək ATU-da təhsil proqramlarının keyfiyyətinin qiymətləndirilməsi üzrə yoxlamalar keçiriblər. Proses zamanı ATU-nun tədris prosesinin təşkili, təhsil proqramlarının icrası, dekanlıqların fəaliyyəti, kliniki bazaların, struktur vahidlərinin və s. işinin akkreditasiya üçün müəyyən edilmiş qayda və meyarlara uyğunluğu qiymətləndirilib.

Sonda IAAR və ATU arasında reytinqin təşkili və keçirilməsi üzrə müqavilə imzalanıb. Müqavilə, həmçinin konsultasiya xarakteri daşıyır.

Tədbirdə, həmçinin beynəlxalq əlaqələr üzrə mütəxəssis Aykız Bauırjankızı, Təhsil Nazirliyinin nümayəndələri iştirak ediblər.